Berthelsenneqataa tunuarmat, Berthelsenni alla borgmesterinngortussangortoq
Malik Berthelsen, atuuffimmi siulimisulli Siumumeersoq, sulinissaminut qilanaalereerpoq.
- Qinersisartut akisussaaffimmik annertuumik tunisinerattut tatiginninnertullu tiguara, taannalu akisussaaffik maniguullunga sulissutigissallugu neriorsuutigissavara, Qeqqata Kommuneani 522-inik qinerneqarluni borgermesterinngortussaq taama oqarpoq.
Malik Berthelsenip qineqqusaarnermini suliniutit pingaarnertut isigisani attatiinnarpai.
Immikkullu suliassatut pingaarnertut pingasut pitsanngorsarneqarnissaat taakkartorlugit. Siullertut meeqqat atuarfiata malunnaatilimmik pitsanngorsarneqarnissaa, suliniutigissavaa:
- Aappaattut inunnik isumaginninnermut ajornartorsiuteqarpugut kommuneni allanituulli taamaattumik taassuma aamma annertusisiamik suliniuteqarfigineqarnissaat pingaartipparput, taavalu taanna pingajuattut inuussutissarsiutit tungaatigut siuarsaasoqarnissaanik 100 procentimik tapersersuinissarput, Malik Berthelsen oqarpoq.
Taanna inuunermi ilaani siusinerusumi ikiaroornartumut hash-imut arlaatigut attuumassuteqarsimavoq erseqqissaavorli tamanna qaangiutereersuusoq.
- Isertuutinngilara inuuninni kukkussutigisarsimasakka, kisianni uannut qujanarnerpaasimavoq inuuninnik allanngortitsisinnaasimanera. Taamaalillunga inuuninni allanngortitsinikkut tatiginassuseq pilerseqqissimallugu isumaqarpunga, Malik Berthelsenip aamma erseqissarpaa, atornerluinerit tamaasa akiorniarnissaat pingaartuusoq.
- Suleqatigiit isumaqatigiissutigaarput peqqinnermut ikiaroornartumullu politikkeqalissasoq pissutigalugu isumaqaratta ikiaroornartumik imigassanik aningaasanoorajunnerlu atornerluisuuneq inuaqatigiinnut akisuallaartoq ingammik meeqqanut, taanna 2009-miit 2013 ilanngullugu Inatsisartunut ilaasortaareerpoq.
Tamatuma kingorna Sisimiuni sisamanik suliffiuteqarpoq, ilaatigut taxaateqarluni. Taassumali ilisimatitsissutigaa suliffiutini attartortiniarlugit.
Inuussutissarsiornermi misilittagaqareernini borgmesterinngornissamunut iluaqutitaqarnissaa Malik Berthelsennip qularutiginngilaa.
Inuussutissarsiutinik ingerlataqareersimanera isumaqarpunga borgermesteritut issiavissannut inginnissannut annertuumik iluaqutigissagiga, Qeqqata kommuneani borgermesterinngortussaq Malik Berthelsen taama oqarpoq.
