BBC: Grækerit aningaasarliornera pillugu aaqqiissutissanik EU avissaartuuppoq
Grækenlandip aningaasarliornerujussuata qanoq iliornikkut ikiorsiiffigineqarnissaa, Europami naalagaaffinnit isumaqatigiinngissutigineqarpoq. BBC World Business Report ullaatungaa taama tusagassiivoq.
Allattoq Ritzau
juulip 07-at 2015 07:16
Grækenlandip akiitsuisa erngiinnaq ikilisinneqarnissaannik Frankrig, Spanien aamma Italien piumasaqartut tamanna tyskinit aaqqiissutissatut isigineqanngilaq.
Grækenland euromik aningaasaqarunnaassappat, grækerit qanoq pitsaanerusumik ikiorserneqarnissaat pillugu tyskit naalakkersuisui maanna oqallisilereersut, BBC aamma nalunaarpoq.
Frankrigimi naalakkersuisut isumaqarput, grækerit qanorluunniit akeqassagaluarpat ikorneqartariaqartut aamma Grækenlandip EU-miiginnarnissaa siunnersuutigalugu.
Franskit premierministeriat, Manuel Valls oqarpoq, Grækenlandi pillugu isumaqatigiinniarnissamut tunngavissaqarluartoqartoq aamma Grækenland euromik aningaasaqarunnaassappat tamanna euro pillugu suleqatigiinnermut ajorseriaasinnaasoq oqarluni.
