B-67 Nagdlúnguarlu finalessapput

B-67 ilimagisaareersutut semifinalemi artorsarani ajugavoq, Nagdlúnguulli ilungersuuteqqaarlugu finale anguaa.
Allattoq Noah Mølgaard
aggustip 10-at 2012 19:39

Unammineq pikkunartorujussuusinnaavoq Nagdlúnguak Ilulissaneersoq aamma B-67 Nuummeersoq angutit arsaallutik pissartanngorniunneranni arfininngornermi ualikkut finalilerpata.

Taakku finalertussanngornerat paasinarsivoq B-67-ip qularnaalluartumik FC Malamuk Uummannameersoq ajugaaffigimmagu. Tassani Nuummiut 6-0-imik ajugaapput unamminerup aallartinneraniit arsaanneq aqullugu.

Nagdlúnguak aamma siorna pissartat G-44 pissanganartumik semifinalemi unammipput tassanilu Nagdlúnguak 4-0-imik ajugaavoq. G-44 unamminerup ilaa pikkunartumik saassusseqattaaraluarpoq arsarli isertinngitsoorlugu. Siukkaat isertitsingajuttoq Zakorat Zeeb pingasunngormat ajoqusernerminik suli qangiinngitsoq iliminit maqaasineqannguatsiaqaaq.

Maanna tassa B-67 aamma Nagdlúnguak arfininngornermi ualikkut finalemi unammisussanngorput. Taakku unamminerminni tamatigut qularnaalluartumik ajugaasarput. Imminnullu unammigamik 1-1-imik naligiiginnareerlutik finalemi arfininngornermi ualikkut 17.00 pissangatitsilaavissussagunarput.

Bronzennanniuttussat tassaapput G-44 Qeqertarsuarmeersoq aamma FC Malamuk Uummannameersoq. Unammineq taanna nalunaaqutaq 15.00 aallartissaaq.

Bronzennanniunneq aamma finale KNR TV-mi radiomilu toqqaannartumik aallakaatinneqassapput.

Angusat:
B-67 - G-44 6-0
Nagdlúnguak - G-44 4-0
Arfininngornermi unamminissat:
Nal. 15.00 G-44 - FC Malamuk
Nal. 17.00 Nagdlúnguak - B-67