AWG2016 qanoq eqqaamarusuppiuk

Arctic Winter Gameseqarnissaanut apummik peqataasussallu 2000-it missaannik utaqqisoqarnerani, unammiuaarnernut eqqaassutissamik Kommuneqarfik Sermersooq unammisitsivoq.
Assi © : AWG2014
Allattoq Camilla Dam
februaarip 24-at 2016 15:25

Eqqumiitsuliortuuguit Nunatsinnut attuumassutilik, eqqaassutissap qanoq isikkoqarnissaanut isumassarsiannik saqqummiussaqarnissannut periarfissaqalerputit.

Eqqugassaq annerpaaq 25.000 koruuninik akissarsitinneqassaaq, eqqugassat aappaat 15.000 koruuninik eqqugassat pingajuat 10.000 koruuninik akissarsitinneqassalluni, taamaammat isumassarsiamik saqqummiussinissaq akilersinnaalluarpoq.

- Eqqaassutissaq AWG 2016-imi aaqqissuussisuusimaneq malunnartinniarlugu kiisalu kajumissutsimik sulisut, namminersortut pisortallu suliffeqarfiutai aaqqissuussap ingerlanneqarnerani peqatigiillutik ikiuuttorpassuit tamaasa qutsaviginiarlugit napparneqassaaq, aaqqissuisut saqqummiussinerminni allapput. 

Eqqaassutissiinissamut piumasaqaatit taassaapput sammivinnit assigiinngitsunit takuneqarsinnaanngorlugu angissusilerneqassaaq, sila qanoq ikkaluaraangalluunniit silamiissinnaassaaq diameteria 2 meterinit annertunerussanngilaq.

Siunnersuutit nassiunneqartut kinaassutsimik nalunaarutitaqassanngilaq. Suliat tamarmik normunik arfineq-marlunnik nalaatsortunik nalunaarsorneqassapput, allakkap puussaanut assinganik normulerneqarsimasumut ikineqassapput, taannalu atermik najukkap aqqanik, oqarasuaatip normuanik, e-mailimillu imaqassaaq. Naliliisoqareerpat allakkap puui tamarmik ammarneqassapput.

Unammisitsinermi ataatsimiititaliamut ilaasortat tassaapput borgmesteri Asii Chemnitz Narup, Ilinniartitaanermut, Kultureqarnermut, Ilisimatusarnermut Ilageeqarnermullu naalakkersuisoq Nivi Olsen, Sulisitsisut Peqatigiiffianni pisortaaneq Brian Buus Pedersen suliamillu ilisimasallit marluk.

Siunnersuutit Deloittemut tunniunneqariissapput kingusinnerpaamik marsip aqqarngani nalunaaqutaq sisamanut, uunga:

Imaneq 33, init tulleriit 6. aamma 7.
Postboks 20
3900 Nuuk
Att. Naalagaaffimmit akuerisaasumit kukkunersiuisumut Bo Colbemut nassiunneqassallutik. 

Ajugaasoq marsip 23-ani toqqarneqassaaq, siunnersuutit nassiunneqarsimasut ingerlatissallugit Kommuneqarfik Sermersuup pisussaaffiginngilaa.. Siunnersuutigineqartorli toqaarneqarpat Katuap saavani napparneqassaaq.

AWG-mi ammaanersiorneq  marsip arferngani aallartissaaq, unammiuaarnerillu marsip aqqarngani naammassissapput.