AWG2016-imi kajumissutsiminnik suleqataasussat pikkorissartinneqalersut

Taamaammat kajumissutsiminnik suleqataasussat suliassanut annertuunut piareersarlugit sukumiisumik pikkorissartinneqaleruttorput.

Tuluit oqaasiinik, kiffartuussinermik, eqqiluisaarnermik ikiueqqaarnermillu pikkorissaanerit Nuummi innuttaasut peqataaffigisinnaasaat januaarip februaarillu qaammataanni ingerlanneqassapput.

Pikkorissaanerit akeqanngitsumik peqataaffigineqarsinnaapput, Arctic Winter Games 2016-illi ingerlanneqarnerani kajumissutsimik suleqataasussatut nalunaarsimanissaq piumasaqaataavoq.

- Pikkorissartitsinissat piviusunngortinnissaannut suleqatigisarpassuatta tapersersuisorpassuattalu tapertaanerat nuannaarutigisorujussuuarput. Assersuutigalugu AWG2016-imi tuluit oqaasiinik pikkorissartitsinissat USA-p Københavnimi aallartitaqarfianit tapersersorneqartut, Niuernermik Ilinniarfik suleqatigalugu piviusunngorput, AWG2016-imi suliniutinut siunnersorti Inger Eriksen taama oqaluttuarpoq.

Pikkorissartitsinerit tamanut ammasut saniatigut immikkut inuusuttunut sinniisuutitanut pikkorissartitsisoqassaaq (Inuusuit Kivitsisussat), inuusuttut 30-t  Nunatsinni sumiiffinni assigiinngitsuneersut peqataaffigisassaannik. Inuusuttut taakku kajumissutsimik suliaqartarnermik, suliniutinik ingerlatsinermik, kiffartuussinermik, issittumi kulturimik, inuussutissarsiornermik, tusagassiuutilerinermik allarpassuarnillu ilinniartinneqassapput. Pikkorissartitsineq taanna Royal Greenlandimit aningaasaliiffigineqarpoq, Inger Eriksen taama oqarpoq.

Pikkorissartitsinerit tamaasa AWG2016-ip nittartagaani takuneqarsinnaapput.