AWG2016-imi kajumissutsiminnik suleqataarusuttut imaaginnavittut
Kajumissutsiminnik suleqataaniarlutik ulloq nalunaarfissaq kingulleq tassaavoq sapaat, 1700-llu nalunaarsimanissaat aaqqissuisut neriuutigaat. Arctic Winter Gamesimillu aaqqissuisut maanna nalunaarutigisinnaanngorpaat katillugit 1750-it kajumissutsiminnik suleqataasussatut nalunaarsimasut.
Kajumissutsiminnillu suleqataanissamut soqutiginninnerujussuaq aaqqissuisunik soorunami nuannaalersitsivoq.
- Nuanneqaaq innuttaasunit, suleqatinit aningaasaliisunillu peqatigineqarnerput tapersersorneqarnerpullu misigalugu. Kajumissutsiminnik sulisugut ukiumikkut, tunuliaqutsimikkut piginnaasatigullu assigiinngiiaartuupput. Nalunaarsimasunut tamanut qujanarujussuaq minnerunngitsumillu suleqataasussanik pissarsioqataasunut qujanaq, Arctic Winter Games 2016-imi pisortaq Maliina Abelsen oqarpoq.
Arctic Winter Gamesimili aaqqissuisut sulisullu pisariaqartilluinnarpaat nalunaarsimasut nalunaarsuinertik tamakkissagaat atsiugassatillu atsiorlugit. Nalunaarsimasut Arctic Winter Gamesip nalaani suleqataarusukkunik kingusinnerpaamik februaarip arfineq-aappaani atsiukkatik tunniutissavaat.