AWG-mi sulisussat illutaarput
Kommuneqarfik Sermersuup illuutaa "Vestre Fængsel"-imik taaguutilik nammineq kajumissutsiminnik suleqataasunut qitiusumik allattoqarfinngussaaq. Illu taanna Nuummi 2002-mi Arctic Winter Gamesertoqarmat aamma allattoqarfiuvoq.
AWG2016 nammineq kajumissutsiminnik suleqataasussanik 1500-t missaannik pisariaqartitsivoq, piareersaanermik unammiuaarnerillu ingerlanneqarnerannik, unammiuaarnerillu kingorna aamma suleqataassallutik.
Nammineq kajumissutsiminnik suleqataasut amerlasuut suliartik aallartereerpaat, qitiusumillu maanna allattoqarfeqalissallutik:
- Kalaallit Nunaanni taamatut aaqqissuussinerit annersaannut illup nammineq kajumissutsiminnik suleqataasunut atorneqaqqinnissaa tulluusimaarutigaarput, Kommuneqarfik Sermersuumi pisortaaneq Steffen Ulrich-Lynge ilaatigut oqarpoq.
Illu tamanut aallaqqaataanut ammatinneqassanngikkallarpoq, upernaalli ingerlanerani tamanut ammasalerumaarpoq, innuttaasullu taamaalillutik saaffiginnissinnaalissallutik, paasissutissanillu pissarsisinnaalissallutik, namminerlu kajumissutsiminnik suleqataasussatut nalunaarsinnaalissallutik.
- Init taakku pitsaasut sulinermut atussallugit uagutsinnut assut pingaaruteqarpoq, Arctic Winter Games 2016-ip pisortaa Maliina Abelsen oqarpoq.