AWG-mi peqataasut tamalugassaqartinneqassapput
Tamulugassaat saarulliit panertut puussiaaqqanut siittartulinnut, zip-lock/chain-pachinik taaneqartartunut 50 grammikkuutaarlugit poortukkat 9.000-it unammiuaaqatigiinnerni peqataasunut tunniunneqarnissaannut piareerput.
- Puussiaaqqat timersortartut peqataasut tamulugassaattut naatsorsuussat, Royal Greenlandip AWG-mut Nanoq-mik taallugu tapiissuteqarneranut attuumassuteqartumik tunisassiarineqarput, Royal Greenlandimi Nunatsinni tunisassianik tuniniaavimmi ingerlatsisoq, Malik Hegelund Olsen oqarpoq.
Royal Greenlandip Nanoq-mik taallugu AWG-imut tapiissuteqarnera aqqutigalugu 1 millionit koruunit sinnerlugit nalilimmik isumaqatigiissuteqarnermigut tunisassiatigut ilaatigut, puussiaaqqanik saarullinnik issimut panertitanik annikitsukkuutaarlugillu poortukkanik, AWG-ip ingerlanneqarnerani nerisassaqartitsinissamik imaqarpoq.
AWG-lu taamaatippat Nunatta sinnerani saarulliit panertut 50 grammikkuutaartut nuannaarutigineqarsinnaassapput.
- Nunatsinni tunisassiat siittartulinnik poortorneqartalernissaat anguniagaavoq, Malik Hegelund Olsen oqarpoq.
