AWG-ip naammassinerani: Team Kalaallit Nunaat ima angusaqarpoq

Alaskami Mat-Sumi ulluni arfinilinni unammiuaareerlutik timersortartut Arctic Winter Gamesimi peqataasut arfininngormat naggataarnersiorput. 

Timersortartut 48-t nunatsinniit peqataapput, oqaluttuarisaanermilu pingaarutilinnik arlalinnik pisoqarpoq. 

Soorlu Randi Zeeb Sigurdsenip Arctic Winter Gamesip oqaluttuarisaanerani aatsaat taama angusarissaartigaluni 190,5 centimeterimik two-food high kickimik arnani inuusuttuaqqani angusaqarmat. 

Imaluuniit kalaallit angutitaasa inuusuttuaqqat armpullernermi ujammit tamaasa pimmatigit, tamanna ataasiaannarluni ukiut 28-t matuma siorna pivoq. 

- Tassa Arctic Winter Games ulluni arfinilinni ingerlareerluni naammassivoq. Peqataasugut inuunerminni eqqaaamajuaannagassaminnik ikinngutitaartorfiusumik ilikkagaqarfiusumillu misigisaqartut qularinngilarput, naggataarnersiornerup kingorna Kalaallit Nunaanni Timersoqatigiit Kattuffiat Facebookimi quppernermini taama allappoq. 

Arctic Sport angusaqarluarfiusoq

Ukioq manna unammiuaarnerni Team Kalaallit Nunaat 56-inik ujaminnappoq. 

Inuit pinnguaataanni Arctic Sportsini aamma eqqillit pinnguaataanni Dene Gamesini peqataasut ujaminnalluarput. Kalaallit Nunaat 22-nik ujaminnappoq, affai guldiullutik. Dene Gamesimilu 17-inik ujaminnapput, taakkunannga arfinillit guldiullutik.  

- Arctic Sportertut malinnaavigalugit nuanneqaaq, taakku unamminerni inissilluarput nunanillu tamalaaneersunut timersortartorpalaartumik ikinngutinnersumik aamma takutitsipput. Akannguaq Lennert Kalaallit Nunaanni Timersoqatigiiffiit Kattuffiat sinnerlugu Arctic Sportimi peqataasunut mision staffiusoq KNR-imut oqarpoq. 

Sulorartartut aamma angusaqarluarlutik 14-inik ujaminnapput, taakkunannga amerlanerit guldiullutik. 

Ujakkaartartut aamma arlalinnik ujaminnapput. 

Timersuutini assigiinngitsunni Kalaallit Nunaata inissinneri uani takusinnaavatit. 

Ujamit ukioq kingullermiit ikinnerit

Ukioq kingulleq Canadami Fort McMurrayimik Arctic Winter Gamesertoqarnerani nunarput angusaqarluarpoq. Timersortartut katillugit 65-iusut 85-inik ujaminnapput. 

Ukioq mannali ujaminnaat ikinnerulaarput, nunarpummi sinnerlugu aallartitat ukioq manna 48-nnaapput. 

Peqataanissaq akisuallaarmat timersoqatigiiffiit arlallit unammiuaarnerit aallartinnginneranni peqataasinnaannginnertik nalunaarutigaat.

Taakkununnga ilaapput nerrivimmi arsaarartartut ukioq kingulleq 15-init ikinnerunngitsunik ujaminnattut, taakkunanngalu aqqaneq-marluk guldiullutik.