AWG 2016: Nalliuttorsiornissamut ukioq affaannanngorpoq
Arctic Winter Games aallartippat Nuummut tikeraartussat 2000-init amerlanerussapput, piareersartoqalereerporlumi.
Tamanna pillugu AWG2016-imi ammaanersiornermi pisussat Nuup illoqarfiani misilinneqassapput, inuillu tassunga atatillugu 600-t ikiuunnissaat pisariaqartinneqarluni:
- Marsimi AWG2016-ip ammaanersiornissaa annertoqaluni immikkuullarissumik aliikkusersuiffiussaaq. Septembarip arfernganni pisussat tamaasa misiligarnissaannut periarfissaqassaagut, suullu tamarmik sapinngisamik piviusorpalaartinneqassallutik. Tamatumunnga asseqanngitsumik nuannerunartumut inuit 600-t ikiuunnissaat pisariaqartipparput, General manager Maliina Abelsen oqarpoq.
Ammaanersiornermi pisussat misilinneqarnerat Nuuk Playgroundimi sapaatiuppat ualikkut nalunaaqutaq tallimanut qiteqquppat aallartissaaq, Inussivimmilu arfineq-marlunut qiteqquppat naammassineqassalluni.
AAMMA ATUARUK AWG 2016-ip erinarsuutitut ilisarnaatissaa Small Times Giantsikkormiut suliarissavaat
Inussivimmi assigiinngitsunik aliikkusersuisoqassaaq, nipilersortoqassalluni, tassa Inngertartut, tumerparpaartartoq Jens Nielsen, torlussortartorlu Hans Henrik aliikkusersuisuussapput.
AWG2016-imi ilisarnaatitut nipilersuutissaq "We are the Arctic", nipilersoqatigiinnit Small Time Giantsikkunnit erinniarineqarlunilu taalliarineqartoq saqqummiunneqassaaq, erinarsutillu saqqummiunnissaanut atatillugu videoliamut assiliisoqassalluni.
Ammaanersiornermi periusissanik misileraanermi peqataasut tamarmik pilerinartunik eqquinissaminnut periarfissaqarput, eqqugassallu tassaapput iPhone 6, iPad mini aamma høretelfonit BOSE-imeersut.
Tassa ammaanersiornissamut pisussanik misiliinermi peqataaniaruit Nuup qeqqanut sapaatiuppat ualikkut tallimanut qiteqquppat ornigutiinnarumaarputit.