Aviisip tusaamaneqartup Nuuk erseqqissaraa
Illoqarfik kulturikkut pisoqarfiulluartoq Nuummi najugaqartunut takornartaanngilaq. Tusarnaartitsinerit, eqqumiitsulianik takutitsinerit, neriniartarfiit kulturikkullu pikialaartitsinerit amerlapput. Tamannalu tuluit aviisiata independentip maanna paasivaa, nittartakkaminullu ilanngutassiartik ima qulequtserpaat:
’Nuuk: Kalaallit Nunaata illoqarfiisa pingaarnersaat taamaammat Nunani Avannarlerni kulturip illoqarfigilerpaa.
Takoriarpassuit pinngortitamukannginnerminni illoqarfimmeeqqaarneq ajortut, aviisi allappoq:
- Eqqumiitsuliortorpassuilli amerliartorput, igasut, kusanartuliortut Kalaallit Nunaat sikorsuaannaananilu qimussiinnaqanngitsoq takutinniarpaat, aviisimi tusagassiortut Nuummut tikeraareerluni allappoq.
Katuaq, Nuummi eqqumiitsulianik katersugaasivik, Arctic Winter Games, Nordisk Kulturfestivalilu aviisimit erseqqissaatigineqarput. Tamakkulu tamarmik Nuuk 17.000-iinnarnik innuttaasulik nunat tamalaat akornanni kulturip illoqarfiisa nalunaarsorneqarneranut ilanngutsitsipput.
Tamanna ilutigalugu pisarneq malillugu tupilannik pinnersaatinillu eqqumiitsuliat takutitsilluarnermut pingaaruteqarput, taakku aqqusinermit assimi takuneqarsinnaasut, independent, qaammammut 16 millioninik atuisoqartoq allapoq.
