Avatangiisit pillugit suleqatigiinneq
Eqqakkat qimatalluunniit nunatsinni avatangiisimut kusanaallisaareeqisut sumiiffippassuarniittut, suunersut mingutsitsisimanersulluunniit nalunaarsorumallugit, amerikamiunik suleqateqarnikkut naammassineqarsinnaanersut misissorneqartussanngorpoq.
Nalunaarsuinissaq aappaagu aallartinneqarsinnaanersoq maanna misissorneqalerpoq, taamaattoqarsinnaaneranik.
Nunarput Danmarki USA-llu suleqatigiinnissamik Igalikumi isumaqatigiissutaasoq periarfissiivoq. Avatangiisit pillugit suleqatigiissutaasinnaasut suleqatigiinnissamik ataatsimiititaliap eqqartuinermini ungasinngitsukkut piviusunngortinneqarsinnaasutut nunat pineqartut pingasut isumaqatigiilluinnarlutik piviusunngortitsilersaartut avatangiisinut pisortaqarfimmi pisortaagallartup Marianne Jensenip oqaatigaa:
- Amerikamiunut timmisartortartunut, sungiusarlutik ingerlaartarnerminni sutigut ikiorsinnaaneraatigut sapaatip akunnerni tullerni saaffiginnittussaavugut, tassa aappagumut isumaqatigiissutaasinnaasut utaqqinngikkaluarlugit aallartisarneqarsinnaasut aallartinnialerpavut.
Marianne Jensen aamma oqarpoq amerikamiut ukiorpassuit ingerlaneranni qimatakkorpaasuarminnik paasissutissaateqarunik nunatsinnut apuuttariaqaraat aamma suliniutigineqartussanngorpoq.
Avatangiisit pillugit suleqatigiissutigisinnaasat allat Marianne Jensenip ima nassuiarpai.
- Immikkoortut pingasut qulequtaritinneqartut tassaapput, avatangiisitsinni eriaginninnitsinnut tungasut, aappaattut pinngortitamut uumasunullu eriaginninnermut tunngasut, pingajuattullu silaannaap llanngoriartornerannut tunngassuteqartut.
Avatangiisinut pisortaqarfiup pisortarigallagaata Marianne Jensenip ilanngullugu oqaatigaa silaannaap kissatsikkiartornera pissutigalugu avatangiisit pissussaannik misissuisoqatigiiffik Asiaq USA-mi suleqatissarsiussasoq aamma nunatsinni suliat ineriartorteqqinnissaat eqqartukkat ilagigaat.
