ASSIT Avatangiisinik saliineq illunillu qajannaarsuineq naammassineqartoq
Issittumi Sakkutooqarfik Namminersorlutik Oqartussanik Qaasuitsullu Kommunianik ikiuilluni nunaqarfinni eqqugaasuni marlunni illut qajannaarsornissaat kiisalu avatangiisitigut saliinikkullu suliniutit arlallit naammassivai. Issittumi Sakkutooqarfik Facebookimi quppernermini taama allappoq.
Danmarkimi upalungaarsimaniarnermut aqutsisoqarfiup sulisuni qulingiluat nunaqarfinnut suliartortippai, taakkulu Qaasuitsup Kommuniata upalungaarsimasui kiisalu umiarsuarmi alapernaarsuummi Ejnar Mikkelsenimi inuttat peqatigalugit Nuugaatsiami illut ajoqusersimasut qaqqaq sisooqqittoqassagaluarpat imaanut kuugussaaqqunagit ajagutarlugillu aalajangersorpaat.
AAMMA ATUARUK Nuugaatsiaq Illorsuillu saliiffigineqalersut
Taamatut suliniuteqarnermi aamma kommunip soqutigisaqartullu allat Nuugaatsiami Illorsuarnilu illuutiminnik, suliffeqarfiutiminnik pisiniarfiutiminnillu matusinissaannik ikiuisoqarpoq.
Issittumi Sakkutooqarfiup aamma ilisimatitsissutigaa umiarsuaq alapernaarsuut Ejnar Mikkelsen nunami suliaqartornerani qaqqaq sisooqqeratarsinnaasoq nakkutigisimagaa, nuna sisuulissagaluarpat nunamiittut erngertumik kalerrissinnaajumallugit.
Danmarkimi Upalungaarsimaniarnermut aqutsisoqarfimmeersut maanna Danmarkimut utereerput umiarsuarlu alapernaarsuut Ejnar Mikkelsen nunatta kitaata sineriaani allanik maanna suliaqarpoq.
