Avannarliit Siunnersuisoqatigiiffianni oqaatsit atorneqartut naligiissikkusukkaat
Nunat Avannarliit Siunnersuisoqatigiiffiata aalajangersimasumik qulequtaqartitsilluni ataatsimiinnera Stockholmimi apriilip pingajuani sisamaanilu ingerlanneqarpoq.
Inatsisartuni ilaasortaq Inuit Ataqatigiinneersoq, Mimi Karlsen, ataatsimiinnermi peqataavoq, siunnersuutigineqartorlu taassuma tapersersorpaa.
- Naligiinneq ataqqeqatigiinnerlu suleqatigiinnermi tunngaviusumik pinngitsoorneqarsinnaanngillat. Nalitsinni nalinginnaasumik oqaatsinik annaasaqarfiusartumi oqaatsillu eqqarsaatigalugit ilatsiinnarfiusumi pingaarutilerujussuuvoq oqaatsitigut assigiinngisitaarnerup, taamalu aamma kulturikkut kinaassutsip attatiinnarneqarnissaa, Mimi Karlsen taama erseqqissaavoq.
Nunat avannarliit suleqatigiinneranni Finlandimiut Islandimiullu oqaasiinik atuinissamik siunnersuut, Mimi Karlsen naapertorlugu, kalaallisut oqaatsit nunat avannarliit suleqatigiinneranni sulinermi oqaatsitut aamma akuerineqarnissaannik Nunatta 2016-imi oktobarimi Nunat Avannarliit Siunnersuisoqatigiiffiannut allakkatigut saaffiginnissutaanut naapertuulluinnarpoq.
- Piffissap takutikkumaarpaa suleqatigiinneq naligiinneruleqqullugu Finlandimit, Islandimit Kalaallit Nunaanniillu tunngaviusumik isummat saqqummiunneqartut minnerpaamik naapertuuttumik aaqqiissuteqarfigineqarsinnaassanersut, Mimi Karlsen taama erseqqissaavoq.
