Avannaata Tuusia

Nunat Avannarliit Siunnersuisoqatigiiffianni Islandip ukioq iluitsoq siulittaasuunera ukiortaamit Danmarkimit tiguneqassaaq, tassungalu atatillugu Islandip nunanut avannarlernut killernut sunniuteqarluarsimanera Danmarkimit nanginneqassasoq Kalaallit Nunaata isumalluarfigaa.

Nunanut avannarlernut naalakkersuisutut Josef Motzfeldtip Nordisk Rådimi Stockholmimi ullumi oqalugiarnermini Island nersualaarpaa suleqatigiiffimmi Vestnordenimi aamma Kalaallit Nunaanut sullissilluarsimanerarlugu pingaartumik takornariaqarnermut inuussutissarsiutinillu aallartitsissarnikkut soorlu Narsarsuarmit Reykjavikimut timmisartortarneq maanna pisartoq.

Aamma ilisimatusarnikkut nunat avannarliit killiit suleqatigiilernerusimanerat maanna aallartisarpoq, Josef Motzfeldt oqarpoq.

Kalaallit Nunaalli aamma periarfissaqarpoq utaqqiinnarani Nunani avannarlerni suleqataanissamut periarfissaqarpoq, Danmarkillu siulittaasunngornissaanut atatillugu Kalaallit Nunaannit suliniutigitinniarneqartoq pillugu Josef Motzfeldt oqarpoq, naalakkersuisuninngaaniit Danmark saaffigereerlugu statsministerip Stockholmimi oqalugiarnermini ullumi oqaatigeriigaatut Kalaallit Nunaata nunanik avannarlernik suleqateqarnermigut issittormiunit peqataaffigineqarluarsinnaasaat pingaartillugit.

Nunanut avannarlernut naalakkersuisoq Josef Motzfeldt iluatsillugu aperaarput amerikamiut aqagu præsidentissarsiornissaannut atatillugu peqqarniisaarnianit sioorasaarisimaneq Stockholmimi malunniussimanersoq, tassungali atatillugu Josef Motzfeldt imatut immikkut sillimaniarnermik maluginiaqarani naak kunngip illorsuarnut allaat isersimaffigereeraluarlugit aaqqissuussinernik malunnartunik takusaqarsimanani, kisianni oqalugiarnerminut atatillugu ullumi oqarsimalluni peqqarniisaarniarneq ullumikkut nunamik aalajangersimasumik angerlarsimaffeqanngitsoq sumiluunniit pisinnaasoq takuneqareerami, nunarsuarmiunullu atatillugu Kalaallit Nunaat suleqataarusuttoq sillimanissamut peqataanissamut.