Kommunip avinneqarnissaa: Avannaata Kommuninngortussap isumaqatigiissut avaqqukkaa

Sulisut Kommune Qeqertalimmut, tassa Aasianni, sulilernissamik neqeroorfigineqarput, isumaqatigiissullu naapertorlugu tamanna itigartikkunikku allamik suliffissarsiortariaqassapput. Naak sulisut sisamat suliffeerukkusunnatik nuunnissaminnut akuersereersimagaluartut, Avannaata Kommuninngortussap, isumaqatigiissut avaqqullugu, naaggaarsimasunik atorfinitsitsisimavoq.
Kommunevåben
Assi © : Qaasuitsup Kommunia
novembarip 15-at 2017 15:50

Qaasuitsup Kommuniani qitiusumi allaffeqarfimmeersut kommuninngortussanut marlunnut suli agguataarneqaruttulerput.

Sulisut 21-t Kommune Qeqertalinngortussap Aasianni allaffeqarfianut nuunnissamik neqeroorfigineqarput. Taakkunannga sisamat akuersisariaqarsimapput, sulisummi sinniisaasa kommunillu sulisitsisutut isumaqatigiissutaat naapertorlugu naaggaarunik suliffitik annaassavaat.

AAMMA ATUARUK 11 kommunemedarbejdere takker nej til Aasiaat

Kommuninngortussalli aappaata, tassa Avannaata kommuniata, naaggaartut aqqanillit, isumaqatigiissut malinnagu, Ilulissani atorfinitsippai, naak sisamat Qeqertalimmi atorfinereeraluartut.

Uukapaatinneqarsimasutut misigisimasut

Sulisut erseqqissumik nalunaarfigineqarsimannginnerat, SIK-p siulittaasuata Jess G. Berthelsenip mamianartuutikkaa, KNR-imi ippassaq oqaluttuaraarput:

- Maannalu uukapaatinneqarsimasutut misigisimapput, ima eqqarsalerlutik: Akuersisimassanngikkaluarama, taava Ilulissaniiginnarsimassagaluarpunga, Jess G. Berthelsen allappoq.

Kommune Qeqertalimmi borgmesterissap, Ane Hansenip, tamanna paasisinnaalluarpaa:

AAMMA ATUARUK Ilaasortagut illaatigineqartutut misigisimapput

- Ajuusaarnartorujussuuvoq aamma tupiginngilara SIK misigisimammat ilaasortatik illaruaatigineqartut. Uagutsinnut taamatupajaaq aamma misinnarpoq.

Avannaatalu Kommuniata kommunitaassap aappaani sulinissamut qujaannarsimasunut neqerooruteqarniarluni ilisimatitsissutigereersimasariaqaraluaraa, Ane Hansen isumaqarpoq.

Taamaaliorsimasuuppatami Qeqertalimmi allatut aaqqiissuteqarsimassagaluarput.

Suliatik kivissinnaasariaqaraat

Kommune Avannarlermi borgmesterissap Palle Jerimiassenip atorfinitsitsisimanini radiokkut Inuiaat Tillernerani ataasinngornermi ima nassuiarpaa.

- Uagut aamma qulakkeerniartussaagatsigu januaarip aallaqqaataani Avannata Kommuniata sulisoqarnikkut kivitsisinnaassutsimigut tassuunakkut aamma pitsaasumik inissisimanissaa, Palle Jerimiassen oqarpoq.

AAMMA ATUARUK Sulisorineqartussat inissaqartinneqassapput

Borgmesteri Ole Dorph naapertorlugu Avannaata Kommuninngortussap taama suleriaaseqarneranik Qaasuitsup Kommunia ilisimatinneqarsimanngilaq.

- Aatsaat ippassaani Sermitsiakkut paasivarput qanoq pisoqarsimasoq. Avannaatalu Kommunia massakkut oqaloqatigaarput paasiniarlugu qanoq iliortoqarsimasoq, borgmesteri Ole Dorph Qanoruumut marlunngornermi oqarpoq.