Avannaata Kommunia missigersuutitigut amigartooruteqassaaq
Taama KNR-imut oqaluttuarpoq, Avannaata Kommuniani kommunip pisortaa, Sivso Dorph.
- Naatsorsiuutiginikuuvarput 57 millionit koruunit sinnilaarlugit Qaasuitsup Kommunianiit kingornussaqartussaalluta. Taamaalilluni ukioq mannamut 51 millionit koruunit inulaarlugit ukiup naanerani uninngasuuteqassalluta naatsorsuutigalutigu.
Qaasuitsup Kommuniata borgmesteria, Ole Dorphip 2017 naasorlu tusagassiuutinut nalunaaruteqarpoq, nuannaarutigalugu Avannaani ukiortaamit kommuninngortunut marlunnut, tassa Qeqertalik Kommunimut aamma Avannaata Kommunianut, aningaasat kommuniusimasumik karsimiittuutit 111 millionit koruunit avinneqarlutik kingornunneqartussanngormata.
Aningaasalli kingornussat asuli atorneqassanngitsut, Avannaata Kommuniata pisortaata oqaluttuaraa.
- Taakku aningaasat ingerlaannaq atorneqartussaanngillat, tassa taakku kommunip sillimmatigisussaavai. Tassa imaakkami, kommunip sillimmateqartariaqarnini tunngavigalugu taakkuupput sillimmatitut uninngasuutigineqartussat, Sivso Dorph oqarpoq.
Avannaani kommuninit marluulersunit kingornunneqartut 111 millionit koruunit, taama amerlatigisussaanngikkaluarput, tassa 2017-imi ukiakkut paasineqarpoq, Qaasuitsup Kommunia 37 millionit koruuninik amigartooruteqartussanngortoq. Taamaammallu sipaarutissanik ujarlertoqalerluni.
Avannaata Kommuniata missigersuutaat naapertorlugit, kommuni 2018-imi 870 millionit koruuninik missigersuuteqarpoq. Kommunip inunnik isumaginninnermut aningaasartuutissaat katillugit 303 millionit koruuniullutik. Taamaattorli Avannaani sanaartugassarpassuaqarpoq kommunip nammineq akilertussaanngisaanik.
- Avannaata Kommuniani ukioq mannamiit aallartittumik sanaartugassarpassuaqarpoq. Siullermik kommunip nammineq ingerlattariaqanngisaanik. Soorlu maani Ilulissani Brugseni, Pisiffik taavalu Isfjordcenteri ukioq manna aallartittumik sanaartorneqalissapput. Taakku sanaartugassat annertuujupput katillugit 400 millionit koruunit missaannik naleqarlutik.
Sanaartornerit pillugit Avannaata Kommuniani suliffissanik pilersitsiortornissaq naatsorsuutigineqarsinnaasoq, Avannaata Kommuniani pisortaq, Sivso Dorph aamma oqarpoq.
