Avannaani qulimiguulimmik timmisartuussinerit allannguuteqartut
Air Greenland naapertorlugu, nunatsinni qulimiguulimmik timmisartuussisarnerup isumannaallisaanikkut nutarternissaa Danmarkimi Angallannermut, Sanaartornermut Ineqarnermullu Aqutsisoqarfiup kissaatigaa.
- Taamaattumik Air Greenland aqutsisoqarfillu qulimiguulimmik taartumi isigisaqarluni timmisartuussisarnissamut tunngavissanik nutaanik suliaqarput, tamatumalu kingunerisaanik Kalaallit Nunaata avannaani kiffartuussinissamut isumaqatigiissuteqarfiusuni angallavinnut pilersaarutit allanngortinneqarput, Air Greenland allappoq.
Nunatsinni taartumi timmisartuussinernut isumannaallisaanerup ullutsinnut naleqqunnerulernissaa allannguinerup siunertaaraa. Tamatumalu kingunerisaanik taarluinnartumi, soorlu seqernup qaammatillu ataatsikkut tarrisimanerini timmisartortoqaqqusaajunnaassaaq.
- Soorunami suliniutit timmisartuussisarnerni isumannaallisaanermik nutarteriffiusut tamaasa tikilluaqquagut – tamanna sullissinitsinni tunngavigaarput. Taamaattumik maanna sullitanut akornusersuutit millisarnissaat kisiat aallutissavarput, niuernermut pisortaq, Maliina Abelsen oqarpoq.
Sullitat allannguinernit sunniuteqarfigineqartunik bilitsillit angalanissamut pilersaarutinik iluarsisanik pissarsissapput. Allannguinerit pillugit apeqqutissaqartoqarpat Air Greenlandip Call Centeria 70 12 12-ikkut attavigineqarsinnaavoq.
