Avannaani nioqqutissaateqarniarneq ajornartoorfiusinnaasoq

Royal Arctic Linep Nunatta kitaata avannaani sikuniarnera pissutigalugu assartuussinini unitsippaa.

Allattoq Jonas Fievé

decembarip 18-at 2015 05:13

Nutserisoq Simon Uldum -

KNI naapertorlugu tamanna Avannaani nioqqutissaateqarniarnermut ajornartoortitsisinnaavoq. KNI-llu erseqqissaatigaa Nunatsinni imaatigut assartuineq Royal Arctic Linep akisussaaffigimmagu assartuinermi Royal Arctic Linep periarfissiissutai KNI A/S-ip taamaallaat naatsorsuutigisinnaagai.

- Pingaarnersiuineq pillugu Royal Arctic Linelu pitsaasumik oqaloqatigiippugut, naatsorsuutigaarpullu nioqqutissat apuunnissaannut Royal Arctic Linep sapinngisani tamaat periarfissarsiuutissagaatigut, RAL-immi imaatigut nioqqutissanik assartuussissussinnaanngippatsigut pissutsit ilungersunarsisinnaapput, KNI-mi nioqqutissanik piniartarnermut nittarsaassinermullu pisortaq Kurt Lauritsen tusagassiorfinnut nalunaarummi taama allappoq.

Umiarsuup alapernaarsuutip Knud Rasmussenip, sikunik aserorterinissaq pillugu avannaanukartinneqarnissaa Royal Arctic Linep kissaatigisimagaa, Issittumi Sakkutooqarfiup ippassaq nalunaarutigaa, umiarsuit assartuutit Pajuttaatip Vestlandiallu Uummannap Sulluani ikiorneqarnissaat siunertaalluni.

Assersuutigalugulu annaassiniarnernut assigisaanulluunniit tunngasunik suliassaqanngippat suliap massuma ingerlatiinnarneqarnissaa aamma pilersaarutaavoq.

Aammattaaq Royal Arctic Linep assartuutaani atortunik ajutoortoqarnera pissutigalugu Qeqertarsuup Tunuani nunaqarfiit ilaat piffissami sivitsortumi nioqqutissanik pajunneqarsimanngillat.

Qeqertarsuup Tunuani nassiussat eqqarsaatigalugit pingaarnersiuinissaq pillugu KNI A/S-ip Royal Arctic Line maanna oqaloqatigaa.

Avannaani nioqqutissaateqarniarneq ajornartoorfiusinnaasoq

Aamma atuaruk