Avaleraasartuut pillugit isumaqatiginninniarnerit sakkortussangatippaat

Nunatta 100.000 tonsit sinnerlugit pisassinneqarnissaa, Aalisarnermut Naalakkersuisoqarfiup piumasaqaatiginiarpaa.
Assi © : Jensinnguaq Jerimiassen
Allattoq Mads Lynge
septembarip 21-at 2014 11:30

Avalaraasartuut Nunatta aningaasaqarniarneranut siunissami qaninnermi isumalluutaassapput, ukiunullu tulliuttunut pisassiissutissanut isumaqatiginninniarnissat taamaammat pingaaruteqarput.

Isumaqatiginninniarnissallu ajornakusuussaqisut, Aalisarnermut, Piniarnermut Nunalerinermullu Naalakkersuisoqarfiup pisortaata Jørgen Isak Olsenip aviisimut Politikenimut oqaatigaa.

- Isumaqatiginninniarnissat ajornakusuussaqaat, tamanna maannangaaq oqaatigereersinnaavara, Jørgen Isak Olsen oqarpoq.

Isumaqatigiinniarnerilli iluatsitsiffiussappata, taava ukioq mannamut pisassarititanit 100.000 tonsiusunit ukiuni tulliuttuni pisassarititat amerlanerusariaqassapput, Aalisarnermut Naalakkersuisoqarfik oqarpoq.

- Avaleraasartuut Atlantikup avannaani nassaassut 13 procentiisa missaat imartatsinniittut misissuinerit takutippaat. Avaleraasartuulli 84 procentii EU-p pisassamisut isigai, sinnerilu Kalaallit Nunaannut, Islandimut Ruslandimullu pisassiissutissatut isigineqarlutik. Tamanna pissusissamisuunngilaq, Jørgen Isak Olsen Politikenimut oqarpoq.

Avaleraasartuunik Nunatsinnut ukioq manna pisassiissutigineqartut 78 procentii maannamut pisarineqarsimasut, Sermitsiami, sapaatip-akunnerani matumani saqqummersinneqartumi allaaserineqarpoq.