Avaleraasartuut imartatsinni siuariartornerat Pinngortitaleriffiup misissuiffigileraa
Pinngortitaleriffik avaleraasartooqassutsimik misissuinerit pingajussaannik ingerlatsilerpoq, sapaatit akunnerinilu marlunni misissuisoqassalluni, Pinngortitaleriffik tusagassiorfinnut nalunaaruteqarluni taama allappoq.
Imartat ukiormanna misissuiffigineqartussat tassaapput Tasiilamiit Nunap Isuanut kiisalu Nunatta kitaata kujasinnerusortaata imartaa.
- Atlantikup avannaata imartaata qaavatungaa ukiormanna siornamut sanilliullugu manna tikillugu nillerneraaq, taamaattumillu pissanganassaaq avaleraasartuut ukiormanna siornatullu kippariarsimatigisinnaanissaat takussallugu, Ilisimartusartoq Pinngortitaleriffimmeersoq Teunis Jansen taama oqarpoq.
AAMMA ATUARUK Ukiormanna avaleraasartoorniarneq aallartinniaasaartoq
Nunatsinniit ukiormanna misissuinissanut attartorneqarput Islandimiut ilisimatusaatigalugu misissuutaat Arni Fridriksson avaleraasartoorniutigisartagaallu Birtingur. Pinngortitaleriffimmeersut ilisimatusartartut aammalu ikiortaat umiarsuarni pineqartuni misissueqataasusssaapput.
Pinngortitaleriffimmeersut misissuinissaat norskit umiarsuaannut marlunnut, Savalimmiormiut Islandimiullu tamarmik ataatsimik misissuutaannut piffissami pineqartumissaaq namminneq imartaminni misissuinissaannut ataqatigiissarneqassapput. Misissuinernit paasissutissat pissarsiarineqartut Atlantikup avannarliup imartaani peqassutsimik tamarmiusumik nunat tamalaat nalilersuinissaanni atorneqartussaapput.
Nunat tamalaat imaani ilisimatusartarnerit pillugit ataatsimiititaliaani ilaasortat qaammammi tullermi ulluni aggustip 25-ianit 31-anut Spaniami ataatsimiittussaapput, misissuinernillu inernerit qulaani pineqartut tassani saqqummiunneqartussaallutik, Pinngortitaleriffik taama nalunaarpoq.
Immap assingani takuneqarsinnaapput Nunatta imartaani avaleraasartooqassutsimik misissuinissat ingelaarfissaat aammalu misissuutissap aappaata Birtingurip assinga. Kisitsisitaanni avaleraasartuunik qaloorfiusussatut pilersaaruteqarfigineqartut ersipput aammalu tappiorannartut misissugassallu allat katersorneqarlutik. Pinngortitaleriffik.
