Avaleraasartuunit isertitat ikinneroratarsinnaapput

Tunup imartaani ukioq manna avaleraasartoorniarneq massakkutut ingerlaannassappat Nunatta karsiata isertitarisinnaasai 40 millionit koruuninik ikinnerussapput, ukioq manna aningaasanut inatsimmi amigaatigineqassallutik.
Allattoq Mads Lynge
aggustip 29-at 2015 15:18

Avaleraasartuunut akitsuutit aqqutigalugit isertitassat ukioq manna 81 millionit koruuniunissaat ukioq mannamut aningaasanut inatsimmi anguniagaavoq, avaleraasartoortassat 85.000 tonsiunerat pissutaalluni 81 millionit koruuninik isertitaqarnissaq anguniagaalluni.

Aalisarsinnaanermut Akuersissutinik Nakkutilliisoqarfiup kisitsisaatai naapertorlugit ukioq manna pisassiissutit affaannaaluunniit anguneqarnaviarunanngillat.

Aggustip 27-at ilanngullugu kisitsisit takutippaat avaleraasartuut maannamut taamaallaat 30.309 tonsit pisarineqarsimasut. Siorna piffissap taamaalinerani 64.675 tonsit pisarineqarsimallutik.

Upernaap nillernerunera ilaatigut pissutaalluni Tunup imartaani avaleraasartuut ukioq manna ikinnerupput, pisarineqartartullu piffissami kingullermi ikinnerullutik. Petur M. Jakobsen, Aalisarsinnaanermut Akuersissutinik Nakkutilliisoqarfimmeersoq KNR-imut taama oqarpoq.

Avaleraasartuut maannamut 30.000 tonsit sinnilaarlugit pisarineqarsimanerat pissutaalluni pisassiissutigineqartut 85.000 tonsit anguneqarsinnaagunanngillat, taamaassappallu aappaagumut aningaasanut inatsisissatut siunnersuummi 81 millionit koruunit isumalluutaanerat ernumassutigineqarsinnaasoq Nakkutilliisoqarfiup oqaatigaa.