Avaleraasartoortassanik agguaassineq Transparencyp oqaaseqarfigaa

Pisassanik agguaassinermut atatillugu apeqqutit soorlu attuumassuteqarpallaarnermut tunngasut politikerinit eqqumaffiginiarneqarsimanerat suliniaqatigiiffimmit maluginiarneqarpoq.

Aaqqiinertulli aalajangiunneqartumit pitsaanerusumik iliuuseqartoqarsimasinnaagaluartoq suliniaqatigiiffik isumaqarpoq.

Siumumeersup Aalisarnermut Naalakkersuisup Karl-Kristian Krusep agguaassinermut atatillugu suliamut attuumassuteqarpallaarnini nalunaarutigaa, tamatumalu peqatigisaanik Siumumi partiip allattaa Mikael Petersen aalisartitseqatigiiffimmut piginneqatigiiffigisaminnut pisassinneqarnissaminnik qinnuteqarluni.   

Aaqqissutissamik nalilersuinermi partiimit Naalakersuisoqataasumit allamit pisassanik agguaasoqarsimasariaqaraluartoq, Transparency Greenlandimit naliliisoqartoq, siulittaasoq Anita Hoffer tusagassiuutinut nalunaaruteqarluni allappoq.

AAMMA ATUARUK Aalisarnermut naalakkersuisoqarfik: Inatsit naapertorlugu avaleraasartuunik agguaassisoqarpoq

Tamatuma peqatigisaanik taanna isumaqarpoq, naak Aalisarnermut Naalakkersuisoqarfiup pisassanik agguaasoqarneranik isornartorsiuisut ilumuunnginneraraluarai, innuttaasut avaleraasartoortassanik agguaanermi aalajangiinermi tunngavigineqartunik aamma suleriaatsip ingerlanneqarneranut tunngasunik ammasumik paasitinneqarnissartik amigaatigaat. Aamma pisassiissutigineqartut sunik tunngaveqarluni agguanneqarsimanersut suli erseqqarluttoq, Anita Hoffer Transparencymit allappoq.

Suliniaqatigiiffiup erseqqissarpaa, Naalakkersuisut siulittaasuata aalajngiisinnaassusia isornartorsiunnginnamikku, attuumassuteqarpallaarnermulli atatillugu ersarinnerusumik isummernissaq pisariaqarnerarlugu, taamaalilluni tusatsiakkat, taamaassorinninnerit naammagittaalliuutillu pinaveersimaneqassammata.