AUL-imi siulittaasoq isumalluartoq
Arctic Umiaq Line A/S, Royal Arctic Line A/S-imit tamakkiisumik maanna pigineqalerpoq. Atuisunulli aallaqqaammut sunniuteqarnavianngitsoq nalunaarutigineqarpoq.
- Maannamut ingerlatseriaaseq atuinnarneqarallassaaq, atuisunut allannguuteqangaarnaviarnani, Arctic Umiaq Linemi siulersuisut siulittaasuat Flemming Knudsen KNR-imut oqarpoq.
Air Greenlandip Arctic Umiaq Linemik piginneqataassutsiminik tuniniaaneranut marlunnik pissutissaqartoq, taassuma oqaatigaa.
- Air Greenland ukiuni qulini peqataavoq, Arctic Travel Group ajalusoormalli Arctic Umiaq Linemik piginneqataalluni, Flemming Knudsen oqarpoq.
Aamma atuaruk RAL-ip Arctic Umiaq Line tamakkiisumik tigugaa
Air Greenlandilu timmisartortitseqatigiiffiuvoq.
- Umiartorneq Air Greenlandip pingaarnertut ingerlatarisimanngisaannarpaa, Flemming Knudsen oqarpoq.
Arctic Umiaq Linep Namminersorlutik Oqartussallu amigartooruteqarnermut qularnaveeqqusiinissamik isumaqatigiissutaata 2016-imi decembarip ulluisa 31-anni naammassineqarnissaa aamma eqqarsaatigisariaqarpoq, piginneqatigiiffiullu ingerlatai Namminersorlutik Oqartussat isumaqatigiissuteqarfigalugit Royal Arctic Linep ingerlateqqinnialertussaallugit.
Arctic Umiaq Line umiarsuaatileqatigiiffimmit tamakkiisumik maanna pigineqalissaaq, umiarsuaatileqatigiiffiummatalu aningaasartuutit ataatsimoorunneqalersinnaasut, siulersuni siulittaasup oqaatigaa.
- Iluaqutissartaqassaaq. Taamaammat Air Greenland oqarpoq: Ukiuni qulini peqataavugut, pissutsillu allanngornikuupput, aninissamullu piffissanngorpoq, tamannalumiuna maanna pisoq, Arctic Umiaq Linemi siulersuisut siulittaasuat Flemming Knudsen naggassiilluni oqarpoq.