Augusta Nammineq
Namminersulernissamut Pisortaqarfimmut aningaasaliissutit sumut atorneqartarneri Atassumminngaanniit paaserusunneqalerput.
Nunatsinni aningaasakilliortoqartillugu pisortaqarfiup 11 millioni koruuninik aappaagumut aningaasaliiviginissaa ilumoorsinnaanersoq Atassutip apeqquserpaa, aningaasallu sumorpiaq atorneqartarnerat paaserusullugu. Augusta Salling isumaqarpoq, naalakkersuisooqatigiit namminersulernissaq pingaartitarigaluaraat, kisianneqartoq:
-Naalakkersuisoqarfik nutaajulluinnaqqissaarpoq taamaattumillu inatsisartuni ilaasortatut pisariaqartipparput naalakkersuisoqarfimmi nutaami qanoq ingerlasoqarnissaa aamma aningaasatigut qanoq aqutsisoqarnera qanimut aamma paasisaqarfigissallugu, nalilersueqqinnissatsinnut tunngavissaqarniassagatta.
Atassutip siulittaasua inatsisartut aningaasanut inatsisissamik siullermeerinnillutik eqqartuereersullu ippassaq taama oqarpoq. Namminersulernissamut Pisortaqarfimmut aningaasaliissutit 10,8 millionit aappaagu 400.000 koruuninik qaffanniarneqarput. 6,1 millioni koruunit sulisunut akissarsiassaapput sinnerilu isaasalerlugu allanut atugassaallutik.
