Atuartut uani unittoortarput

- Pissutsit pitsanngoriartuaartut malunnarpoq. Iluatsitsikkiartuaartoqarneranimmi takussutissaqarpoq, Aarhusip Universitetiani professori Peter N. Allerup taama oqarpoq.

Nunarsuarmi atuartitsinermik ilinniartitsinermillu annertuumik taanna ilisimasaqarpoq, Atuarfitsialaallu 2003-mi atuutilerneranut atatillugu alloriarfinni misilitsitsissutinik pilersitseqataanikuulluni.

Meeqqat atuarfiata nutartigaanera, Atuarfitsialak, ukioq manna quliliivoq, atuartullu atuarnertik tamaat nutarterinermi periutsit malillugit atuarsimasut siulliit aasaru naammassissallutik.

Atuarfitsialaap maannamut killiffia Inerisaaviup Aarhus Universitet suleqatigalugu nalilersortissimavaa, professori Peter N. Allerup ilaatigut suleqatigineqarluni.

Nunatsinni meeqqat atuarfianni atuartut 3. klassemiit 7. klassemut matematikkimi piginnaasaat nunani allani atuartunut nallersuussinnaapput, kingornali ajornartorsiulersarlutik. 10. klassemummi anngukkaangamik kingornalu ilinniaqqinnialeraangamik ajornartorsiulersarput.

- Matematikki atuartitsinerup nalaani immikkut iliuuseqarfigineqanngikkaangat, atuartut ilikkakkatik puigoriartulersarpaat. Taamaattoqarnera uissuumminartutut nalilerneqarsinnaavoq. 7. klassemit 8. klassemut alloriarnermi misilitsinnermi angusat 10. klassemi ilaatigut puigorneqarsimasarput. Tamanna ajornartorsiutitut taarusuppara, Peter N. Allerup oqarpoq.

Ilinniartitsisussaaleqisoqarnera ilaatigut pissutaasoq, taassuma oqaatigaa.

- Matematikkimik atuartitsinermi ilinniartitsisup piginnaasaqassusia apeqqutaalluinnarpoq, matematikkimillu immikkut ilinniarsimasunik amigaateqartoqarnera ajornartorsiutaavoq, Aarhusip Universitetiani professori Peter N. Allerup oqarpoq.

Atuarfitsialak pillugu naliliinermi nalunaarusiaq Inerisaaviup nittartagaatigut www.inerisaavik.gl -ikkut takuneqarsinnaavoq.