Assi: Kommune Kujalleq

Atuartut angerlarsimaffiat ikioqquvoq

Nanortalimmi atuartut angerlarsimaffianni forstanderi sulisussanik noqqaalluni kommunimut saaffiginnittarsimagaluarpoq, kinguneqanngitsumik.

Kommune Kujallermi ilaatigut sulisunik amerlanerusunik atorfinitsitsinikkut, atuartut angerlarsimaffii nukittorsarneqartariaqartut, Meeqqat Illersuisuat isumaqarpoq.

Nanortalimmi atuartut angerlarsimaffianni sulisut tallimaapput, taakkunannga marluk ilinniarsimasuullutik. Sulisup ataatsip meeqqat nalinginnaasumik 24-t ulluinnarni nakkutigisarpai.

Tassani atuartut 13-iniit ukiullit, ilaatigut ilinniagasserinermi sammisassaqartitsinermilu pisariaqartitsisut, marlullu pisariartitsinerusuusut, najugaqarput.

- Taakku qanoq ilillugit sullinnissaannulluunniit eqqarsarnissamut ilaanni periarfissaaruttarpugut meeqqat amerlangaarmata uagullu sulisut suliffiup nalaani nalinginnaasumik ataasiinnaasaratta. Pisariaqartitseqaagut, qasseriarluta qinnuteqarnerpugut, forstanderi, Oline Augustinussen, oqarpoq.

Meeqqat Illersuisuata nalunaarusiamini allaaseraa atuartut angerlarsimaffiini inuunermikkut ajornartorsiuteqartunik arlalinnik meeraqartoq. 

Forstanderillu tamanna ilisarisinnaalluarpaa.

- Arlaliupput, soorlu avinnernik angajoqqaallit. Taavalu meeqqat akuerisinnaanngisaat, soorlu meeraanermi misigisat annersaanerillu imigassamik peqquteqartumik.

Isumaginnittoqarfillu taakkununnga qangalili iliuuseqareersimasariaqaraluartoq, forstanderi Meeqqat Illersuisuat isumaqatigalugu oqarpoq.

Ulluinnarnilu sulineq artornarsinnaasaraluaqisoq, meeqqat suleqatiginnilluartarmata forstanderip nersualaarpai:

- Ataasiinnaatilluta immikkut nakkutiginninniarneq ajornarsinnaasarpoq, kisianni meeqqat qujanartumik  paasinnillutik suleqatigiilluartarnerisigut ilaanni oqinaartarparput.

Meeqqat Illersuisuat ilaatigut inerniliivoq, meeqqat nunaqarfimmiut atuarfik naammassigaangassuk amerlasuut ilinniariaqqinngitsoortartut.

Nanortalimmili atuartut angerlarsimaffianneersut, forstanderi nammineq naapertorlugu, amerlanerit angusarissaarmata isumalluarpoq.

- Angerlarsimaffimmi atugarisat oqimaakkaluarlutik kisianni maaniileraangamik angusarissaartaqaat assut, Nanortalimmi atuartut angerlarsimaffianni forstanderi, Oline Augustinussen, oqarpoq.

Pitsanngorsaanerit aallartereersut, Kommune Kujallermi borgmesterip, Jørgen Wæver Johansenip, oqaatigaa, Meeqqalli Illersuisuata innersuussutai misissorneqaqqissaassasut neriorsuutigalugu. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!