Atuartut aasaanerani atunngiffeqarnerat sivikinnerussaaq
Atuarfiit matoqqaneranni atuartitsinermut qanoq kinguneqassanersoq angajoqqaarpassuit ernummatigisimavaat.
Angajoqqaat maanna ernumatissaarupput.
Ullut atuartitsiviusartut ukiumut 200-uusut naliginnaasut tamarmik naammassineqarnissaat qulakkeerneqarput, Kommuneqarfik Sermersuumi atuarfeqarnermut ingerlatsivimmi pisortap Jesper Madsenip nalunaarutigaa.
- Arctic Winter Games sioqqullugu aammma naammassineqarnerata kingorna atuartut feeriartinneqassapput, siniffiit piareersarneqassammata kingornalu piiaarneqassammata. Atuanngiffeqarfissaat piffissami allammi pissapput, Kommuneqarfik Sermersuumi meeqqanut atuarfeqarnermullu kiffartuussivimi pisortaq Jesper Madsen oqarpoq.
Tamatuma kingunerissavaa atuartut aasakkut atuanngiffeqarnerat sivikinnerussammat.
Aamma atuaruk ASSIT: AWG-mut peqataasussat ima ineqassapput
Aasakkut atuanngiffeqarneq sivikinnerulaassaaq, atuanngeffeqarfissallu piffissanut allanut nuunneqarlutik.
Taamaalillutik ukiumut ullut atuartitsiviussussat tamakkerlugit atuartitsiviussapput.
- Meeqqat atuareernerup kingorna paaqqinniffimmi imaluunniit sunngiffimmi sammisassaqartitsivimmi paaritinniarlutik allatsissimasut maluginavianngilaat, taakkua pisarnertut ullaakkut atuareernerup kingorna paaqqinnittarfinnut paaritittarfinnulluunnit aggiuttarsinnaavaat ualikkullu aamma aatittarsinnaallutik.
Jesper Madsenip ilanngullugu oqaluttuarivaa atuartut Arctic Winter Gamesimut tunngassuteqartunik suliaqartassasut aamma Arctic Winter Games 2016-mik aaqqissuussisut atuartunut assigiinngitsunik sammisaqartitsissasut.
Atuartut atuartussaangitsut issittumi unammiuaartunik malinnaasinnaassapput aamma Nummi inuusuttut siuarsartut illuanni NUIF-imiinnissaannut periarfissaqassapput.
- Atuareernerup kingorna orniguttarfinnut allatsissimanngitsut NUIF-imiissinnaapput taanna Arctic Winter Games-eqartoqarnerani ullaakkut arfinq pingasut qeqqanut ammartassaaq, Kommueqarfik Sermersuumi atuarfeqarnermut sullissivimmi pisortaq Jesper Madsen oqarpoq.
