Atuartut 26-t Frankrigiliarnissaminnut piareersartut

Tasiilami atuartut 26-t franskit atuartut ukioq manna Tasiilamut tikeraarsimasut najugaqarfigiartorlugit Lyonimukassapput.

Atuartut aasaanerani atuanngiffeqalinnginnerminni angalanissaannut piareersaatitut immikkut atuartinneqarput. Atuartinneqarnermi avatanngiisit, oqaatsit kulturikkullu allanngoriartorneq sammineqarpoq, Kommuneqarfik Sermersooq tusagassiutinut allappoq. 

Atuartut tamarmik immikkut franskinut attaveqarput taakkulu allaqatigisarpaat. Attaveqaqatigiinnermi oqaatsit tuluttut atorneqarput. Franskit Tasiilamiinnerminni kalaallit ilaqutariit najugaqarfigaat kalaallillu aamma franskini najugaqarnissaat pilersaarutaavoq.

Angalanerminni illoqarfik Lyonip ungasinngisaaniittoq orninneqassaaq atuartullu qaqqat Alperne qanillulluarnissaannik periarfissaqassapput. Taamaalilluni Frankrigimi silap allanngorneriartornerata kinguneri takuneqarsinnaassapput.

- Lyonimut tikeraarnitsinni qaqqani sermit aajuitsut ukiuni kingullerni qulini sunnigaasimaneri takuniagassatta ilagalugaat, Tasiilami Alivarpimmi ilinniartitsisoq, Mikael Franks oqarpoq.

Atuartut Frankrigimiinnerminni aamma ullualunni nunami illoqarfiit pingaarnersaanni Parisimiilaartussaapput.

- Tasiilami atuartut taama periarfissinneqarnerat annertuumik nuannaarutissaavoq, tassami misigisassaat paasiniagassaallu pissaganartupilussuupput siunissamilu ilaatigut atorneqarluarsinnaallutik.

Mikael Franks silap allanngoriartornerata paasiniarneqarnissaa kulturikkullu paarlaasseqatigiinneq EU-p aningaasaateqarfianit aningaasaliiffigineqartoq pillugu taama oqarpoq.