Ilinniarneq Timersorneq

AWG2016 Atuarfinni aserfallatsaaliuinerit atuarfeqarnermut ataatsimiititaliap nuannaarutigai

Kommuneqarfik Sermersooq Arctic Winter Gamesertoqarnerani 17,5 millionit koruuninik aningaasartuuteqarpoq. Aningaasartuutillu atorluarneqartut, Kommuneqarfik Sermersuumi atuarfeqarnermut ataatsimiititaliami siulittaasoq isumaqarpoq.

Allattoq Sara K. Jakobsen, Bibi Nathansen

marsip 16-at 2016 07:00

- Taamaammat nuannaarutigisorujussuuarput ataatimiititaliami taamatut meeqqanut inuusuttunullu timersornerup tungaatigut aningaasanik atuisimagatta siunertaqarluartumik, ataatsimiititaliami siulittaasoq Demokraatineersoq, Poul Hansen oqarpoq.

Arctic Winter Gamesimut 68 millionit koruuningajaat aningaasaliissutigineqarput. Taakkununnga Namminersorlutik Oqartussat, Kommuneqarfik Sermersooq aamma suliffeqarfiit assigiinngitsut aningaasaliisuupput.

Kommuneqarfik Sermersoorli aaqqissuussamut 22 millionit koruuninik aningasaliissutimini saniatigut 17,6 millionit koruunit aningaasartuutigai.

Aamma atuaruk AWG-mut millionerpassuit atorneqartut iluaqutaalluarput

Aningaasartuutit inuusuttut issittormiut timersornikkut naapisimaarnerannut toqqaannartumik atorneqartut saniatigut kommuni aamma allanut aningaasartuuteqarpoq, tassa timersortarfinnik atuarfinnillu aserfallatsaaliuinermut pitsanngorsaanermullu 9,5 millionit koruunit ukiut pingasut ingerlanerini atorsimagamigit.

Tamannalu pissusissamisoortoq Meeqqanut, Ilaqutariinnut Atuarfeqarnermullu ataatsimiititami siulittaasoq isumaqarpoq.

- Kommuneqarfik Sermersuumi suleqatigiinnitta atsiorsimanerata ilisarnaatigigaa meeqqanik inuusuttunillu sullissinitta taamatut timitalersimanera, aningaasanillu taamatut atuineq pissusissamisoortutut uanga isigivara, Poul Hansen oqarpoq.