Atuarfik Hans Lyngemi ulloq qinersiffik
Atuartut sinniisuisa siulittaasussaannik ukiumoortumik qinersinermut atatillugu tamanna pissaaq, Atuarfik Hans Lyngemilu tamanna immikkut malunnartinniarneqartarpoq.
Qinersineq atuarfiup eqaarsaartarfiani nalunaaqutaq 10.30-11.30 ingerlanneqassaaq, tamannalu sioqqullugu ullaarnganiilli oqallittoqassalluni.
Oqallinnerlu pereerpat atuartut 501-iusut eqaarsaartarfimmut qinersiartussapput.
- Kingullermik periuseq malillugu qinersineq una aamma qinersinivittut ingerlanneqassaaq piviusorsiorpalaartumik. Qineqqusaartut namminneq qinersiartoreerunik tusagassiortunit apersorneqarsinnaassapput tusagassiortut inaanni - atuakkanik atorniartarfimmi, atuarfimmi Oqartussaaqataanerup ullua pillugu aaqqissuussisut taama oqaluttuarput.
- Peqqussut malillugu atuartut tamarmik inuiaqatigiinni oqartussaaqataaneq malillugu naleqartitat suunersut ilinniartussaavaat taamaammallu atuarfitsinni tamanna ersarissarniarlugu taamatut iliuuseqarniarpugut, atuartuutitta tamanna misigigunikku paasissammassuk qinersigunik namminneq aamma sunniuteqaqataasinnaassallutik kiisalu oqartussaaqataaneq malillugu kiffaanngissuseqassagaanni aamma akissussaaqataaneq paasissallugu, Atuarfik Hans Lynge tusagassiorfinnut nalunaarummi taama allappoq.
Ilinniartitsisut aamma neriuutigaat atuartut angajoqqaatik eqqaasissagaat angajoqqaat atuarfiup siulersuisuinut qinersisussaammata, tamannalu aamma ullumi pissaaq nalunaaqutaq 14.00-20.00.
