Atuakkiorfik tunineqarsinnaanngorunarpoq

marsip 11-at 2005 17:07

Pisisussarsiuussineq qaangiuteqqammerpoq piserusuttunillu arlalinnik nalunaartoqarsimasoq, Atuakkiorfimmi siulersuisuni siulittaasup Knud Lund Olsenip nalunaarutigaa.

Knud Lund Olsenip piserusullutik saaffiginnissimasut oqaloqatigalugit ulapputigileruttorpai, qassilli kikkullu nalunaarsimanersut oqaaseqarfigerusunngilai. Isumaqatigiinniarnerit qanoq sivisutigisumik ingerlanneqassanersut kikkullu pisisuussanersut aamma oqaaseqarfigisinnaannginnerarpaa.

- Imaassinnaavoq ulloq ataaseq imaluunnit sapaatip-akunneri marluk isumaqatigiinniartugut. Knud Lund Olsen nassuiaavoq.

Atuakkiorfik Nunatta Naqiterivianit pigineqarpoq, Naqiterivillu Namminersornerullutik Oqartussanit pigineqarluni. Atuakkiorfik ukiut kingulliit ukiumut 900.000 kroninik tapiiffigineqartarpoq.