Atuakkiat nunatsinneersut immikkut taaguuteqalersut
Atuakkiat taamaattut amerlangaarmata Kalaallit Nunaanni pinerluttulersaarutit immikkut atuakkiap suussusaannik Nuuk Noir-imik taaguuserneqarsimapput. Danskit aviisiat Jyllandsposten taama allappoq.
Pinerluttulersaarutip ”Frk. Smillas fornemmelse for sne” nunarsuarmi tusaamaneqarlualernerata kingorna Kalaallit Nunaanni assigiinngitsorpassuarnik pisoqarnikuuvoq. Silap pissusiata allanngoriartornera, Issittumi sukkaniuunneq aatsitassarsiornissamik takorluugaqarnerit kalaallinut soqutiginninnermik pilersitsipput. Tamannalu atuakkiortunut aamma soqutiginnilersitsisoq, aviisi allappoq.
Jyllandsposten naapertorlugu ukiuni kingullerni pinerluttulersaarutit ikinnerpaanik qulingiluat Kalaallit Nunaannut pisuusaartinneqartut saqqummerput, upernaamullu pingasut nutaat saqqummissallutik. Taamaalilluni Nuuk Noir taaguutivinngoriartulerluni.
Atuakkiortut ilaata Nina von Staffeldtip pinerluttulersaarut frosnebeviser Nuummi Sisimiunilu pisuusaartinneqartoq ukioq kingulleq saqqummersippaa, Tor Even Svanesip sikumi pissanganartulersaarut ”Skamskudt” arnap inuusuttup umiarsuarmi puisinniummiinneranut tunngasoq saqqummersissavaa. Atuakkiortup Mads Peder Nordbop Nuummeersup atuakkat sisamat saqqummersissimavai pinerluttulersaarut kingulleq ”Pigen uden hud”-imik ateqartoq saqqummersippaa.
Atuakkiortut tamarmik nunatsinnut soqutiginnilersitsisunik piukkunnartunillu oqaluttuatsialaqartitsilersunik naakkittaannermut, pinngortitamut nunallu ineriartorneranut tunngasunik allataqarput.
