Attartortut PBS atorlugu akiliisalissapput

Inissiaatileqatigiiffimmi A/S INI-mi attartortut katillugit 955-it ullut 14-ikkaarlugit akiliissartut, tassa girokortit atorlugit akiliisartut, inissiaatileqatigiiffiup nutaamik maanna isumaqatigiissuteqarfiginiarpai. Tassa ullumikkumiit ullut 14-kkaarlugit inissiaatileqatigiiffimmut akiliisarneq atorunnaarsinneqarpoq, siunissamilu aningaaserivikkut PBS aqqutigalugu akiliisoqartaliassalluni - imaappoq bankimiit tamatigut akiligassat akilerneqarnissaat isumagineqartalissalluni.

- Massakkut neriuutigaarput siunertaralugulu girokortimik akiliiffissat piffissami siusinnerujussuarmi nassiussorneqarsinnaanngornissaat qaammallu naanngitsoq atuisut taanna tigoreersinnaanissaat, Inissiaatileqatigiiffik A/S INI-mi attaveqaqatigiinnermut pisortaq, Else Løvstrøm oqarpoq.

Aamma atuaruk PBS kisiat atorlugu INI-mut akiliisoqarsinnaanngorpoq

Ullut 14-kaarlugit akiliisarneq ullumikkumiit atorunnaarsinneqarpoq, atuisullu nutaat taamatut periarfissaarupput. Atuisut ullut 14-ikkaarlugit maanna akiliisartut kalerrinneqarput, oktoberip aallaqqaataani tamanna unitsivinneqassasoq.

Tamassumunnga pissutaanerulluni, inissiaatileqatigiiffimmi allaffissornikkut sulisut attartortut pappialatigut akiliisarnerisa kingunerannik, taakku allanik suliaqaratik piffissamik annertuumik atuisarneri taamaatitinniarlugu.

Ullut 14-ikkaarlutik aningaasarsisartut aningaaserivinni missingersuutinut kontomik pilersitseqqullugit, taamaasillutik aningaaseriviit aqqutigalugit akiligassat akilerneqartalissammata, Else Løvstrøm siunnersuuteqarpoq.

Attartortut sungiussiumaarput

A/S inissiaatileqatigiiffimmi  INI-mi illunik inissianillu attartortut nuna tamakkerlugu 10.000 missaanniittut ilaat 955-it, ullut 14-ikkaarlugit akiliisarput. Taakku ilaasa akileeriaatsimut nutaamut sungiussitinneqarnissaat unammillernartussaassasoq, Else Løvstrøm oqarpoq.

- Soorunami unamminartuussooq, kisianni nalunngilarput PSB-imut akiliinissarput siusinnerusukkut nassiussorutsigit taava atuisut takkunniissaat pinaveersaartissuarput, Inissiaatileqatigiiffik A/S INI-mi attaveqaqatigiinnermut pisortaq, Else Løvstrøm oqarpoq.

Immikkorluinnarli ittoqartillugu, soorlu attartortoq PBS aqqutigalugu akiliisarnissaanut itigartitaasimappat immikkut ittumik aqqiisoqarsinnaasassasoq,  A/S Inissiaatileqatigiiffik INI nalunaarpoq.