Atletikimi ujaminnanngillat

Maanna qularutissaanngitsumik paasinarsivoq Island Gamesimi kalaallit ujaminnattaavi ukiut marluk matuma siorna angusaasunit ikinnerusussanngortut taamanikkut kalaallit arfineq pingasunik ujaminnammata. Maanna ujamik ataasiinnaaq qulakkeersimaneqarpoq.

Louise Ferrio Guernsey-meersoq arnat 10.000 meterimut arpanneranni pissartanngoqqippoq atorsimallugit minutsit 37,22, ukiullu marluk matuma siorna ajugaanerminit sukkaneruvoq taamanikkut minutsit 37,53 atoramigit. Nunarput sinnerlugu atletikimi peqataasutuaq Liza Tuperna Itzchaky sukkanersaasunit kaajallannermik ataatsimik qaangertippoq. Arpannerup aallartinnerani malinnaagaluarpoq, taamaattoq paasinarsivoq arpaqatai 10.000 meterimut arpallaqqinneroqisut. Liza Tuperna Itzchaky peqataasuni quliusuni kingullersaalluni apuuppoq, atorsimallugit minutsit 40-qqissaat.

Sulorartartoq Sara Lindskov Jacobsen bronzennanniuttussanngorpoq arnat ataasiakkaarneranni. Semifinalemi ajorsarfigaa Anna Showan Isle of Wightimeersoq 21-10, 21-18-mik. Pingasunngornermi angutit iligiiaarput ujamminnanniunnissanulli annguttortaqaratik. Sisamanngornermi arnat angutillu akuleriillutik iligiiaassapput. Maannali paasinarsivoq sulorartartut nunarput sinnerlugu ujaminnattussatut isumalluarfigineqarnersaasut ikinnerusunik ujaminnatussanngortut.

Volleyballertartut aamma ujaminnanniuttussaajunnaarput. Arnat Rhodosimut 3-0-mik ippassaq ajorsarput taamalu normu 8-nngorniuttussanngorlutik. Angutit Ålandimut 3-0-mik ajorsarput maannalu normu 7-nngorniuttussanngorlutik.

Arnat arsaattartut Ålandimut ullaap tungaa semifinalessapput. Unammineq taanna qulingiluanut radioaviisi naammassiniariarpat KNR radiokkut toqqaannartumik aallakaatinneqassaaq.