Atlantikup avannaani filmiliornikkut suleqatigiinnerulernissaq sulissutigineqartoq

Danmarkip Islandillu filmiliornerup iluani suleqatigiinnertik ukiuni kingullerni annertusareerpaat, ilaatigut suleqatigiinnikkut filmiliortoqartarluni.
 
Det Danske Filminstitut aamma Det Islandske Filmcenter suleqatigiinnertik annertusaqqinnialerpaat, atlantikup avannaani suleqatigiinnermut Kalaallit Nunaat Savalimmiullu ilanngullugit.
 
Tamatumunngalu alloriarneq siulleq tassaassaaq Nordvest Coproduction Meeting Reykjavikimi oktobarip 23-anit 25-anut pisussaq, tassanilu danskit islandimiullu suleqatigiinnerat pitsaasoq Kalaallit Nunaannik Savalimmiunillu suleqateqalernermik annertusarniarneqarpoq. Filmiliortartut nunanit pineqartunit sisamaneersut naapisimaassapput misilittakkaminnik paarlaasseqatigiissallutik aammalu killeqarfiit pitarlugit attaveqaqatigiinnermik pilersitsissallutik.
 
Savalimmiut aamma Kalaallit Nunaat ukiuni makkunani filmiliornerup tungaatigut pisoqarfiulluarput. Katrin Ottarsdóttirip ukiormanna filmiliaa "Ludo" Savalimmiuni ukiuni 15-ini kingullerni filmiliarineqartut siullersaraat, savalimmiormiullu allap, Sakaris Stórásip filmeeraliaa "Vetrarmorgun" Berlinalimi ukiormanna nersornaaserneqarpoq.
 
Nunatsinnilumi aamma filmiliornerup iluani pisoqarfiulluarpoq, ukiuni kingullerni filminik nutaanik saqqummersitsisoqartarluni.
 
Taamatut suliniuteqartuupput Savalimmiuni filmiliornermi sullissivik Klippfisk, Namminersorlutik Oqartussat Kultureqarnermut Naalakkersuisoqarfiat, kalaallit filmiliortut peqatigiiffiat Film.gl, ilaatigullu Nunat avannarliit kulturimut aningaasaateqarfik suliniummut tapiissuteqarsimavoq.