Atlantikup avannaamiut qinersinermi aalajangiisuusinnaapput

Atlantikup Avannaani Folketingimut qinigassanngortittut qinersinerup inerneranut ukioq-manna aamma pingaaruteqassaqisut Danmarkimi aviisit arlallit ullumi allaaseraat. Isumasiuinerimmi arlallit takutippaat saamerlernik talerperlernillu qinersiniartut amerlaqatigiingajalersut.
Allattoq Carla Davidsen
septembarip 08-at 2011 06:14

Atlantikulli Avannaani qinigassanngortittut agguataarnerat allanngungaarnavianngitsutut isikkoqarpoq, tassa ataaseq Inuit Ataqatigiinniit, ataaseq Siumumiit, Republikaneriniit ataaseq ataaserlu Sambandspartimiit, nutaarsiassaqartitsivimmi Ritzauimi isummersorput.

Taamali isummersorneq naatsorsuutitigut tunngavissaqarpianngilaq.
Sermitsiaq Facebook aqqutigalugu isumasiuisitsivoq, qinersisartullu Inuit Ataqatigiinneersoq Sara Olsvig, aamma Siumumeersoq Nick Nielsen, piukkunneruaat. Qinersisartulli ilaannamininnguisa Facebook atortarpaat.

Atlantikup Avannaani qinigassanngortittut aalajangiisuussappata aatsaat taama pisoqarnavianngilaq. Jens Otto Kragip ministeriuninngornissaa Moses Olsenip 1971-imi qularnaarpaa, Poul Nyrupillu ministeriuninngornissaa Joannes Eidesgaardip 1998-imi qularnaarlugu.