Atlantikup avannaaamiut qinersinermi aalajangiisooqqissinnaapput
Folketingimut aqagu qinersinissaq 1998-imi qinersinertut inerneqaratarsinnaavoq, taamani ministeriunerup Poul Nyrup Rasmussenip ingerlaqqinnissaa Savalimmiunit qinigaasup qulakkeermagu.
Savalimmiuni isumasiuisarfiup Fyndip isumasiuinerata takutippaa partiit Republikanerit Socialdemokraatillu naligiittupilussuusut. Savalimmiuni aviisi Sosialurin taama allaaserisaqarpoq.
Partii talerperliusoq, Sambandspartiet, Lars Løkkemik tapersersuisuusoq, 26,5 procentinik taaguunneqarluni qinersinermi taaguunneqarnerpaasussatut maanna isikkoqarpoq, partiillu Republikanerit Socialdemokraatillu naligiinnerullutik.
Isumasiuinerit naapertorlugit, Socialdemokraatit 22,4 procentinit taaguunneqassangatinneqarput Republikanerillu 20,7 procentinit. Socialdemokraatit Helle Thorning-Schmidt tapersersorniarlugu nalunaarutigereerpaat Republikanerillu Savalimmiut namminerisaminnik tunngaviusumik inatsisileqalernissaannik tapersersuerusuttumik tapersersuiniarlutik nalunaarutigaat.
Atlantikup avannaamiut ilaasortaatitassaat taamaalillutik kiap ministeriuninngornissaa aalajangeratarsinnaassavaat.
Nutaarsiassaqartitsivik Ritzau naapertorlugu, Folketingimi saamerliit Helle Thorning-Schmidtimit siuttuuffigineqartut 87-inik ilaasortaqalissangatinneqarput, talerperliit Lars Løkke Rasmussenimit siuttuuffigineqartut 88-inik ilaasortaqalissangatinneqarlutik.
Folketingimi amerlanerussuteqassagaanni ilaasortat 90-iusariaqarput.
