Atisat atornikut mattammik taarserpaat
Kullorsuarmiut meerartaat atisanik amigaateqarput. Nunaqarfimmi 500-ut inulaarlugit inulimmi 200-llu missaannik meerartaqartumi inuussutissarsiornikkut periarfissat killeqartorujussuupput. Angajoqqaat arlalitsigut Upernaviliaqqaarlutik atisassarsiniartarput.
- Kisianni atisat pisiassat akisoqaat toqqagassallu killeqarlutik, Kullorsuarmi ilinniartitsisoq Knud Karl Thorleifsen KNR-mut oqaluttuarpoq.
Facebook tamatumunnga atorniarlugu aalajangerami nunaqqatimi pisariaqartitsinerat allappaa. Tamatuma kingorna paarlaasseqatigiinnissaq aallartippoq. Irene Jeppson Nuummeersoq kassinik marlunnik nassiussivoq atisanik atornikunik nutaanillu kiisalu pinngussanik imaqartunik.
Atisat pinngussallu nunaqarfimmiunut qujarussisunut agguaanneqareerput.
- Oqareernittut nunaqarfitsinni inuussutissarsiornikkut periarfissat killeqarput ikittuinnaallu internetimut attaveqarput. Taamaammat atisanik nioqqutissanillu allanik internetikkut inniminniiginnarsinnaanngillat, Knud Karl Thorleifsen oqarpoq.
- Angerlarsimaffitsinni internetimut attaveqarpunga taannalu aqqutigalugu nunaqqatitta meerartaasa iluaqutigisinnaasaannik periarfissanik ujarlerlunga, oqarpoq.
Ajornarpallaanngikkaluarpoq
Nalunaarutitut allaataa facebookimi inuppaalussuarnit atuarneqarpoq ikittuinnaalli arlaannik iliuuseqarput. Irene Jeppson Nuummiittoq meeqqat atisarpassuinik pigisaqarpoq panimmi arfineq pingasunik ukioqalingajalersup mikigilersimasaanik. Taamaammat poortuilluni aallartippoq aammalu pinngussanik ilallugit.
- Nassitsiniarnerma siunertaanik paniga oqaluttuuppara taannalu aamma ulappuserpoq pinngussat atorunnaakkani soorlu inuusat Barbiet atisaatinilu poortorlugit, Irene Jeppson KNR-mut oqaluttuaropq
Paarlaasseqatigiinneq maanna naammassivoq. Nunaqarfimmiut atisanik pissarsipput aammalu Irene Jeppson mattannik nassitsissimalluni.
- Uani takuinnarsinnaavarput pisariitsunnguamik ikioqatigiittoqarsinnaasoq. Nalunngilara ilaqutariippassuit meeqqat atisaat mikigilikkat igiinnartaraat. Atisat tamakku meeqqat allat iluaqutigisinnaakutsooraluarpaat, Knud Karl Thorleifsen oqarpoq.
Taamatuttaaq nipimmik atisanik nassitsisoq isummersorpoq.
- Takusinnaavara amerlasuut Knud Karl Thorleifsenip facebookimi allataa nuannarigaat. Kisianni tassa amerlanerit poortuisinnarlutik nassiussinngillat, Irene Jeppson oqarpoq.
- Apeqqutaatinngilara pissarsinissara. Nuannaarutigiinnarpara atisat atorunnaakkavut allanit iluaqutigineqarmata. Kisianni soorunami tuppalliutigaara mattammik nassissimallunga nalunaarmat, Irene Jeppson oqarpoq.
Knud Karl Thorleifsen, ukiuni 32-ni Kullorsuarmi najugaqarsimasoq nulianilu peqatigalugu nunaqarfiup atuarfiani ilinniartitsisutut sulisoq, Danmarkimi ilaqutariinnit atisanik nassitserusuttunit attavigineqareerpoq.
- Niviarsiaqqat atisarpassuinik pissarsivut taakkulu qujanaqaat. Aammali qujanassagaluaqaaq nukappiaqqat atisaannik pissarsisinnaagutta, Knud Karl Thorleifsen oqarpoq.
