Atisaarniarfiup angerlarsimaannartussaagaluarlutik pisiniartut anisikkai
Nuka Din Tøjmand Nuummi illoqarfiup qeqqaniippoq.
Tassani atisanik tamalaanik soorlu arsaassutinik ulluinnarnilu atisanik pisiarineqarsinnaapput.
Atisaarniarfimmili sulisut piffissami kingullermi toqqissimanngillat. Tamanna Danmarkimiit nunatsinnut tikerlaat ulluni tallimani angerlarsimasussaatitaasut pisiniarfiliartarsimanerannik pissuteqarpoq.
Angerlarsimaannarnissamut malittarisassat
- Nunatsinnut tikikkuit ulluni tallimani angerlarsimaannassaatit.
- Ullut tallimassaanni misissorteqqissaatit.
- Angerlarsimaannarnerup nalaani pisuttuarsinnaavutit, najugaqatigisatit attavigisinnaavatit aamma ulluinnarni atortussanik pisiniarsinnaatitaallutit.
- Pisiniarnissannulli anersaartuutinut illersuummi kiinnamulluunniit assersuummik atugaqassaatit.
- Allanut pulaassanngilatit, pulaartoqassanngilatit, aaqqissuussinernut peqataassanngilatit, bussissanngilatit, taxassanngilatit suliartussanallu.
- Ullut tallimassaanni misissorteqqinnianngikkuit tikinninniit ullut 14-it angerlarsimaannassaatit.
Atisaarniarfik naapertorlugu pisiniat qulit missaanniittut Danmarkimit tikeqqammersut sulisunit anisinneqartariaqarsimapput, atisaarniarfiup pisortaata tullia, Charlotte Andreassen oqarpoq.
- Sapaatip akunnera kingulleq ullut pingasut ingerlanerani inuit qulit missaaniittut anisippagut, taanna oqarpoq.
Taassuma pisiarfimmut isertut angerlarsimaannartussaatitaanersut angerlarsimaannartussaatitaannginnersulluunniit aperisarsimagaat oqaatigaa.
AAMMA ATUARUK MT Højgaard coronamut atatillugu akiligassiinerit pillugit: Taamaattoqarnikuunngilaq taamaattoqaqqissagunanngilarlu
Taamaaliortarnerat atisaarniarfiup Nuummi akunnittarfiit annersaanut, Hans Egedap illutaanut atassuteqarneranik ilaatigut pissuteqarpoq.
Ilaat anersaartuutinut illersuuteqarnatik atisaarniarfimmut isertarput.
- Soorunami toqqissisimananngilaq. Ilaa uagut nunatsinni iluatinnarnermik una ajunngilagut (coronavirusertoqanngilaq). Soorunami kialluunniit kissaatiginngilaa takkuttoqassasoq taamatut toqqissisimananngilaq, Charlotte Andreassen oqarpoq.
Corona pillugu aqutsisoqarfik: Atisarsinniarnissaq pisariaqanngilaq
Angerlarsimaannartussaatitaanermut maleruaqqusat naapertorlugit ulluinnarni atugassanik pisariaqartunik pisiartitassaqanngikkaanni taamaallaat pisiniartoqarsinnaavoq.
Tamanna Naalakkersuisut siulittaasoqarfiani pisortap, Hans Peder Barlach Christensenip erseqqissaatigaa. Taanna Namminersorlutik Oqartussani corona pillugu aqutsisoqarfimmi aamma siulittaasuuvoq.
- Pisariaqaavissut tassaapput nerisassat imaluunniit nakorsaatit, Hans Peder Barlach Christensen oqarpoq.
- Pisariaqaavinngillat taakku ilaa tiitorfiit kamippaallu nalinginnaasumik pigineqartarput. Taamaattumik aamma apeqqutigineqassappat kavaajanik akikillisanik ikiaqutinik assigisaannillu taakkua naatsorsuutigivagut inuit nalinginnaasumik pigigaat. Pisariaqaavinngillat ullut taakku ulluni tallimani utaqqisingaatsiarneqarsinnaapput ilaanarneqarsinnaapput.
Taanna angerlarsimaannarnissamik unioqqutitsisut politiinut nalunaarutigineqartassasut isumaqarpoq.
- Maleruagassanik malinninngitsut ingerlaannaq politiinut nalunaarutigineqartassapput. Taakkua suliassarivaat inuit maleruagassanik unioqqutitsisut oqaloqatigissallugit. Taava facebookkikkut nalunaarneq atuuteqanngilaq, kisianni toqqaannartumik ingerlaannartumik politiinut. Taava politiit suliaq suliarissavaat.
Kalaallit Nunaanni Politiit angerlarsimaannarnissamut maleruaqqusanik unioqqutitsisut eqqumaffigineqartut KNR-imut mailikkut akissutigaat:
- Tassunga atatillugu paasissutissiissutigisinnaavarput Kalaallit Nunaanni Politiit atisarsinniarnissaq ulluinnarni nioqqutissanik imaluunniit pisariaqartitanik pisiniarnissatut pisariaqarluinnartutut isiginngilaat, politiit paasissutissiipput.
Atisaarniarfimmi angerlarsimaannartussaatitaasut pisiniarnerisa kinguneratigut isaariami allagartarsuarmik ikkussisimapput. Tamannalu iluaqutaasimasoq, pisortap tullia, Charlotte Andreassen oqarpoq.
- Anisitseqqinngilagut taassumap kingorna.
Coronavirus pillugu apeqqutissaqaraanni ullut tamaasa nalunaaqutaq arfineq pingasuniit sisamap tungaanut Hotlinemut 80 11 00-imut sianerluni paasiniaasoqarsinnaavoq imaluunniit allalluni corona@nanoq.gl-imut.
