Atassutip inuusuttaasa Naalakkersuisut siunnersuutaat akerleraat
Atassutip Inuusuttaasa Kattuffiata siulittaasua Aqqalu Jeremiassen, tusagassiuutinut nalunaarummi taama ilaatigut allaaserisaqarpoq.
Ilanngaassivimmik pilersitsisoqarnissaanut Naalakkersuisut siunnersuutaat akuersissutigineqarpat, innuttaasut akissarsiaat tigutinnagit ilanngaassivikkoortalissapput, assersuutigalugu akileraarutissat akiligassallu allat soorlu ineqarnermut, innaallagissamut imeqarnermullu akiligassat ilanngarneqareeraangata akissarsiat kontonnut nakkartalissapput.
Oqartussat innuttaasut aningaasaataasa qanoq atornissaannut taamaalillutik aalajangiisalernissaat, Atassutip Inuusuttaasa ernummatigaat:
- Ila tupinnaqaaq nunatta siuttuisa tatiginata meeqqatut aqukkumaannarpatigut, Aqqalu Jeremiassen, Atassutip Inuusuttaasa Kattuffiata siulittaasua oqarpoq.