Atassut: Suli utaqqivugut

oktobarip 08-at 2004 13:17

Royal Greenland Naalakkersuisut siulittaasuata oqartussaaffeqarfianut inissinneqaraluartoq, Atassut isumaqartuarpoq Royal Greenland-imi pisimasut nassuiaassutigineqartariaqartut.

Atassutip siulittaasua Augusta Salling oqarpoq, naalakkersuisut siulittaasuat Hans Enoksen saaffigisaraluarlugu akissuteqarneq ajormat, Inatsisartut Siulittaasoqarfiat massakkut piumasaqaateqarfigigitsik, Naalakkersuisunut piumasaqaqqullugu, suliap ingerlasimaneranik nalunaaruteqarnissamik.

Atassutikkormiut qulakkeerusuppaat, naalakkersuisut pisut pillugit eqqortumik iliuuseqarsimanersut, qulakkeersuspaallu pisimasup nunatta tusaamanerlunneqalerneranut aqqutaasinnaanera.

- Matooriniarneq takusarput Atassummiit akuersaarsinnaangilarput, tamannalu arlaanaanulluuniit iluaqutaanavianngilaq, Augusta Salling oqarpoq.