Atassut Demokraatillu isumaqataanngillat

Nunatsinni partiit talerperliunerusut Atassut aamma Demokraatit Danmarkimi partiit amerlanerussuteqartut oqariartuutaannut, tassalu kalaallit nunasisutut isigineqartalernissaannut aamma akerliupput.

- Tusaannarlugu nuannarinngilara, akuersaaruminaatsipparalu naalagaaffeqatigiinnerup iluani taama pisoqassappat, Demokraatit siulittaasuat Per Berthelsen oqarpoq.

Ilanngullugu oqarpoq, Demokraatinit pingaartillugu danskit nunatsinniittut iluamik pineqarnissaat, taamalu kalaallit Danmarkimiittut iluamik pineqarnissaat, naalagaaffeqatigiinnerup iluani akaareqatigiinnissaq eqqarsaatigalugu.

Atassutip siulittaasuata tulliata Finn Karlsen-ip Danmarkimi taama siunnersuuteqartoqarsimanera aamma nuannarinngilaa.

- Danskit nunatsinniittut kalaallisut oqalussinnaanngitsut ilinniarnissaannik ilinniaqqinnissaannillu periarfissittarpagut, qanoq kalaallit Danmarkimi najugallit ilinniarsinnaanngippata ikiorsiissutaat peerniarneqassappat, Finn Karlsen aperivoq.

Aamma isumaqarpoq, naalagaaffeqatigiinneq eqqarsaatigissagaanni taama siunnersuuteqartoqarsinnaanera kusananngitsumik pissusilersornerusoq ammullu isiginninnerusoq.