Ataqqinaammik doktorinngortinneqartoq arnaq siulleq aamma nakorsaq

Ilisimatusarfiup ukiumoortumik tallimanngorma, tassa septembarip 25-anni nalliuttorsiornerani, ataqqinaammik doktorinngortitsisoqarpoq arnamik aamma nakorsamik.
Allattoq Apollo Jeremiassen
septembarip 26-at 2015 18:30

 

Tassa nakorsaq immikkut ilisimasalik, Gert Mulvad aamma eskimologi, Inge Kleivan ataqqinaammik doktorinngortinneqarmata.

 

Ataqqinaammik doktorinngortinneqartoq arnaq siulleq

Ilisimatusarfiup ukiuni 31-ni atuunnerani arnamik ataqqinaammik aatsaat doktorinngortitsisoqarpoq. Aamma peqqissaanermik ilisimatusarfiup iluani siullermeerluni aamma aatsaat doktorinngortitsisoqarluni.

Eskimologip Inge Kleivanip ataqqinaammik doktorinngortinneqarnerani, lektorip Kenneth Pedersenip tunngavilesuutigai, Inge Kleivanip politikkikkut soqutigisaqarneri aamma nunat inoqqaavisa piginnaatitaaffiinik illersuillunilu oqariatuuteqartarneri taamatullu ukiuni 60-ini atuakkiortarnermini, Kalaallit Nunaat pillugu atuakkiarisarsimasai Ilisimatusarfimmit nersualaarneqaratarneri oqaatigalugu.

 

Gert Mulvadip ilisimatusaatai issuarneqartarput

Nakorsap Gert Mulvadip ataqqinaammik doktorinngortinneqarnera pillugu, Aalborgip Universitetiani nakorsaaneq, Stig Andersen ima oqalugiarluni tunngavilersuivoq.

- Nappaatit assigiinngitsorpassuit pillugit Gert Mulvadip ilisimatusarneri atorluarneqarlutik annertuumik issuarneqartarput taamatullu Mulvadip saqqummiussai nunarsuatsinni tamani siaruarsimapput soqutigineqaqalutillu, Stig Andersen oqalugiarpoq.

Ilisimatusarfimmi ataqqinaammik doktorinngortinneqartut tassaasarput, ilisimatusarnerup iluani ataqqisariaqartunik atorluarneqarsinnaasunillu ilisimatusarsimasut.

Ilisimatusarfimmit ataqqinaammi doktorinngortinneqartut siulliit tassaapput professor Robert Petersen, Michael Hauser, Henrik Wilhjelm, Finn Lynge aamma Christian Berthelsen.

Aamma atuaruk