Ataavartumik Ataatsimiititaliami ukiumoortumik ataatsimiinneq aallartittoq

Naalagaaffiit Peqatigiit Nunat inoqqaavisa atugaat pillugit Isummersoqatigiiffiata ataatsimiinnerat FN-ip qullersaanit Ban Ki-moonimit New Yorkimi ammarneqarpoq, sapaatillu-akunnerata tullianut ataatsimiittoqassaaq. Isummersoqatigiiffiup ukiuni kingullerni 15-ini angusimasaat Ban Ki-moonip pilluaqqussutigai.

FN-ip ukioq manna septembarip tungaanut siulittaasussaa Mogens Lykketoft kingorna oqalugiarpoq. Danmarkip Kalaallit Nunaannut attaveqarluarnera taasssuma ilaatigut oqaluttuaraa, nunallu inoqqaavisa unammilligassarpassuaqarnerat aamma eqqartorlugu.

Naalagaaffiit Peqatigiit Onadaga-indianerit nunaanni naapissinnaanerat Canadap inatsisinik atuutsitsinermut ministeriata Jody Wilson-Raybouldip oqalugiarnini aallarnerlugu qujamasuutigaa.

Taanna nunani killerni kisiartaalluni inatsisinut atuutsitsinermut ministerit akornanni indianerinut høvdingiuvoq, nunasiaateqarsimanerullu qimavinneqarnissaanut Canadap naalakkersuisuisa suliniuteqarnissamut neriorsuinerat oqalugiarnermini aamma saqqummiuppaa.

Ukiut hunnorujulikkuutaat maanna atuuttut tassaasariaqartut nunat inoqqaavisa ukiui taassuma siunnersuutigaa, nunat inoqqaavisa nunani assigiinngitsuni atugaasa pitsanngorsaavigineqarnissaannut suliap naammassillugu nanginneqarsinnaaninissaa periarfissaalissammat.

Nunat inoqqaavi nunanit assigiinngitsuneersut 2500-t missaat New Yorkimi ataatsimeersuartoqarnerani peqataapput.