Ataatsimoortumik tapiissutit ikilisikkiartuaartinnissaat Demokraatit isumaqatiginngilaat
Demokraatit namminersorneq pillugu isumaqatigiissutip naaggaarneqarnissaa 2008-mi innersuussutigaat. Pissutaasoq annerpaasoq taamani takusinnaagatsigu, kalaallit isaannit isigalugu isumaqatigiissutip aningaasartai ajorpallaarmata.
- Maannakkullul IA-p bloktilskuddit suli ikilisarniarpai, tamannalu imminut ataqatigiinngilluinnarpoq.
Demokraatit siulittaasorigallagaat, Randi Vestergaard Evaldsen, IA-p ukiortaami siunnersuutaa pillugu taama oqaaseqarpoq. IA-p Nunatta Danmarkimit tapiissutinik ukiut tamaasa 10 millionit koruuninik apparsaaniarnera, akisussaaffimmik annerusumik tigusiartuaarnissamik siunertaqarpoq.
- Kalaallit Nunaat danskit tapiissutaannit isumalluuteqaannassanngilaq. Kalaallit Nunaalluunniit annertunerusumik aningaasatigut isertitaqassanngikkaluaruni, IA-p siulittaasua Sara Olsvig taama oqarpoq.
AAMMA ATUARUK Ataatsimoortumik tapiissutit ikilisarnissaat IA-p siunnersuutigigaa
- Kisianni qanoq tamanna ataqatigiissinnaava, IA-p akisussaaffinnik inuiaqatigiinnilu allannguinissanik annertuunik tiguseqataarusunnginnami? IA-lu inuiaqatigiinni sanngiinnerusut pitsanngorsaaffiginianngilai, qanorlu aningaasanik amerlanerusunik isertitsiniarsinnaaneq, allatut qanoq pissarsiniarniarpa, Demokraatit siulittaasuat aperaaq.
- Aap, tamanna imminut ataqatigiinngilluinnarpoq, Randi Vestergaard Evaldsen, eqikkaavoq erseqqissaallunilu, Namminersorluni isumaqatigiissut 2009-mi atuutilermalli, Kalaallit Nunaannut tapiissutinik isertitassanik millionilikkuutaanik tamanna annaasaqaataasimasoq.
- Aningaasat isumaginninnermut iluaqutaallutik atorneqarsinnaasimagaluartut, Demokraatit siulittaasuat tusagassiutinut nalunaarummini ilaatigut allappoq.