Minik Dahl Høegh.Assi: KNR

Anfører Pan Ami pillugu: - Ataatsimoornissarput piffissanngorpoq

Angutit assammik arsartartut nunanut allanut unammisartup sungiusaasullu Pan Am-ip Nuummi aappaagu ingerlanneqarnissaa iluatsissasoq neriuutigaat. Aningaasarpassuilli unammiartussallu nunanit assigiinngitsunit aqqanilinneersut angallanneqarnissaat suli inissinneqanngilaq.

Aaqqissuussaq iluatsinngitsuussagaluarpat nunatsinnut annaasaqaataangaatsiassasoq sungiusaasoq Niels Møller isumaqarpoq.

- Kalaallit Nunaanni aaqqissuussaq taama annertutigisoq periarfissarujussuuvoq, iluatsinngitsuussappallu uggornassaqisoq isumaqarpunga, Niels Møller oqarpoq.

AAMMA ATUARUK Pan Am-ertoqarnissaanut assartuinissat aningaasallu amigaataasut

Nunani tamalaani assammik arsarnermi unammersuarneq Pan Am ukioq allortarlugu ingerlanneqartarpoq. Tullianilu Nunatsinni, tassa qaammatit qulit qaangiuppata, ingerlanneqartussaalluni.

Assammik arsartartut suleqataasussallu 300-t missaaniittut Nuummukaasussaapput. Aningaasalli peqataasussallu angallanneqarnissaasa ataqatigiissaarnissaat ajornakusoortinneqarpoq.

Aaqqissuussallu piviusunngornissaa sungiusaasup pingaartippaa. Timersortartunuinnaanngitsoq nunatsinnut aamma sunniuteqarluassangatikkamiuk.

- Inuiaqatigiinnut annaasaqaataasorujussuussaaq, Niels Møller oqarpoq.

AAMMA ATUARUK Nunatsinni Pan Am-ertoqarnissaa nalorninarsisoq

Pan Amip Nuummi ingerlanneqarnissaa piviusunngussappat aningaasartuutit ataqatigiissaarnissaannut 5 millionit koruunit missaanniittut Kalaallit Nunaanni Assamik Arsartartut Kattuffiata pisariaqartippai.

Aningaasaliisussarsiornissamullu pisariaqartitsisoqassappat assammik arsartartut anføriat Minik Dahl Høegh ikiuunnissamut piareersimavoq.

 - Aningaasaliisinnaasunik ujartuinermi ikiortissanik pisariaqartitsisoqarpat qanoq iliorluni aningaasaliisoqarsinnaasunik ujarlernermi ikiuussinnaakutsoorpugut, Minik Dahl Høegh arsaqatigisartakkani sinnerlugit oqarpoq.

Kalaallit Nunaatalu ataatsimoorluni Pan Am-ip piviusunngortinnissaa suleqatigiissutigeqqullugu kaammattuutigaa.

- Ataatsimoornissarput piffissanngorpoq, ataatsimoorluta aaqqissuussap annertuup piviusunngortinnissaanut, Minik Dahl Høegh oqarpoq.

Pan Am-illu aaqqissuunnissaa iluatsinngitsoornissaa nunanut allanut unammisartut sungiusaasuata aarleqqutigaa.

 - Unammersuaarnissat piviusunngunngitsuussappata, taava ukiorpassuit aatsaat qaangiuppata Kalaallit Nunaat aaqqissuussamik taamak annertutigisumik aaqqissuussinissamik periarfissinneqassaaq, Niels Møller oqarpoq.

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!