Ataatsimiittarfissaq pillugu ullormi ataatsimi oqallisissapput

Inatsisartut ataatsimiittarfissaat Inatsisartunit 2013-imi oqallisigineqarmat amerlanerussuteqartunit akuerineqarpoq. Qinersisoqaqqinnerali pissutaalluni siunnersuutip oqallisigineqaqqinnissaa aalajangerneqarpoq.

- Oqaluuserineqareernikuuvoq, paasissutissanik nutaanik ilaqanngilaq massakkullu naqissuseqqiinnagassaavoq. Taamaammat qanoq pisoqarnissaa Inatsisartut kisimik aalajangersinnaavaat, taannalu inersuarmi eqqartorneqaleruni piumaarpoq, Inatsisartut siulittaasoqarfianni siulittaasup tullia Agathe Fontain oqarpoq.

Siunnersuutip oqallisigineqarnissaanut ulluliussaq allanngortinnissaanik Demokraatit piumasaqaateqarlutik Inatsisartut siulittaasoqarfiannut allakkatigut saaffiginnipput.

Inatsisartut ataatsimiittarfittaassaat akisussammat ukiunnullu tulliuttunut aningaasartuutaasussaanera pissutigalugu peqqissaarullugu suliarineqartariaqartoq, Michael Rosing Demokraatineersoq isumaqarpoq.

- Periuseq tamanna oqartussaaqataanermut naapertuunnanilu matoqqasuusoq isumaqarpugut. Ulluisa immikkoortinneqarnissaat kissaatigaarput, taamaasiornikkullu ammanerusumik oqallisigineqassaaq, Michael Rosing oqarpoq.

Inatsisartulli siulittaasuat isumaqataanngilaq.

- Inatsisartut siulittaasoqarfiat demokratiskiuvoq, siunnersuutillu Inatsisartuni qanoq suliarineqassanersut namminneq aalajangigassaraat. Tamanna oqartussaaffigaarput, taamaammat isumaqarpunga demokratiimik avaqqutsinerusuunngitsoq, Lars-Emil Johansen oqarpoq.

Siunnersuut oktobarip 21-ani siullermeerlugu aappassaaneerlugulu suliarineqassaaq.