Ataatsimiititaliani toqqaariaaseq allanngortinneqassanngilaq
Simon Olsenip naalakkersuisutut tunuariarluni aningaasaqarnermut ataatsimiititaliamut siulittaasunngortinneqarnera ileqqorissaarnissaq pissuserissaarnissarlu pillugit partiimut innarliisimanngitsoq, ataatsimiititalianullu inissitsitertarneq siunissami allanngortittariaqanngitsoq, Siumup politikkimut siulittaasuata tullia Kalistat Lund isumaqarpoq.
Siumup ataatsimeersuarnissaani ataatsimiinnernilu allani pisoq eqqaaneqassaqqaartoq Kalistat Lundip qularinngilaa.
Simon Olsenip toqqarneqarnera sinerissami Siumup immikkoortaasa ilaasa uparuarpaat naliliinerlunnerunerarlugu, ingammik ileqqorissaarnissaq eqqarsaatigalugu. Kalistat Lund oqarpoq Siumup siulersuisuunerisa imaluunniit sinerissami immikkoortortaqarfiit inatsisartuni ataatsimiititaliamut inissitsiterineq akuliuffigisassarinngikkaat.
-Inatsisartuni ilaasortat 12-lluta ataatsimitiitalianut toqqaaneq sapinngilarput, periaaserlu allanngortinneqartariaqanngilaq, Kalistat Lund oqarpoq.
