Ataatsimeersuarneq: Heilmannip sanaartorneq pitsaanerulersikkusukkaa

Ineqarnermut Naalakkersuisoqarfik sulisitsisut peqatigiiffiat peqatigalugu sanaartorneq pillugu Nuummi ullumi ataatsimeersuarnermut qaaqqusisuuvoq.
septembarip 23-at 2014 05:30
Nutserisoq Elisa Isaksen

Ataatsimeersuarneq isumalluarpaluttumik anguniagaqarpoq, tassami sanaartorneq pitsaanerulersinniarneqarpoq, akikinnerulersinniarneqarluni naammassisaqarfiunerunissaalu anguniarneqarlutik.

- Sanaartornermi pitsaassuseq qaffattariaqarparpoq, meeqqavut kinguaassavullu tulliuttut inissiaatitta siusippallaamik aserfallattarnerini unammilligassanik, ullumikkut atukkatsinnik atugaqassanngippata, ineqarnermut naalakkersuisoq Siverth K. Heilmann oqarpoq.

Sanaartornermut atortussiat nunatsinneersut atorneqarnerunissaat kissaatigineqarpoq
Nunatsinni sanaartornermi pitsaassuseq minnerpaamik nunarsuarmi sumiiffinni allani atorneqartutut qaffasitsigisoq atorlugu sanaartortoqassaaq, Naalakkersuisuni ilaasortaq oqarpoq.

Politikerip Atassummeersup taassuma oqaatigineqartartoq aamma oqaatigaa, tassa sanaartornermi atorneqartut sapinngisamik Nunatsinneersut atorneqartariaqartut. Taamaattorli Siverth K. Heilmannip tamatuma qanoq piviusunngortinneqarnissaa oqaatiginngilaa.

Sanaartornermik suliaqartut Hotel Hans Egedemi ataatsimiinnerminni ilaatigut sanaartornermi akit sanaartornerullu pitsaassusia oqallisigissavaat. Ataatsimeersuarnermik aaqqissuisut tassaallutik Ineqarnermut Naalakkersuisoqarfik Sulisitsisut Peqatigiiffiat suleqatigalugu.